Memlekettik satyp alý máselesi boıynsha zań jobasyna qandaı túzetýler enedi
Qarjy mınıstrligi múddeli memlekettik organdarmen jáne «Atameken» Ulttyq kásipkerler palatasymen birlesip, jergilikti qamtýdy qoldaý boıynsha turaqty jumys júrgizýde.
«Otandyq óndirýshilerdi qoldaý maqsatynda mynadaı sharalar qabyldandy. Birinshiden, ulttyq rejımnen alyp tastaýdy belgileý boıynsha Úkimettiń 2 qaýlysy qabyldandy. Alǵashqysy – avto, transformatorlar jáne kabelder, ekinshisi – jeńil ónerkásip taýarlary, jıhaz jáne tsement. Ekinshiden, kórsetilgen atalymdar aldyn ala biliktilik irikteý (ABІ) arqyly konkýrs tásilimen ǵana satyp alynatyn taýarlar tizbesine engizildi. Aldyn ala biliktilik irikteýinen ótýdiń negizgi krıterııi – ındýstrııalyq sertıfıkattyń bolýy», - dedi B. Sholpanqulov Úkimet otyrysynda.
Úshinshiden, Memlekettik satyp alý týraly zańda tapsyrys berýshilerdiń tehnıkalyq erekshelikterde ulttyq standarttardy kórsetý mindeti belgilendi.
Tórtinshiden, otandyq taýar óndirýshiler tizimine engizilgen qurylys materıaldaryn paıdalanýdy kózdeıtin qurylys salasyndaǵy jumystardy memlekettik satyp alý týraly úlgilik sharttar bekitildi.
«Jergilikti qamtýdy odan ári damytý barysynda Parlamenttegi memlekettik satyp alý máseleleri boıynsha zań jobasynda mynadaı túzetýler anyqtalýda: birinshiden, memlekettik satyp alýlarda taýarlardy kepildi satyp alýdy (offteık-kelisimsharttar) paıdalaný; ekinshiden, ulttyq standarttarǵa, Indýstrııalyq sertıfıkattarǵa jáne ST-KZ sertıfıkattaryna baılanystyrý arqyly, retteletin satyp alýdyń barlyq túrleri úshin biryńǵaı kodıfıkatsııany paıdalanyp, taýarlardyń elektrondyq katalogyn engizý. Úshinshiden, memlekettik satyp alýlardy tolyq ortalyqtandyrýǵa kóshý, bul jergilikti qamtýdy arttyrý máselelerin ortalyqtan retteýge múmkindik beredi. Bul rette atalǵan sharalardyń ishinen otandyq óndirýshilerdi qoldaýdyń eń tıimdi mehanızmi ulttyq rejımnen alyp tastaýdy belgileý ekenin atap ótken jón. Sondyqtan beıindi mınıstrlikterge osy quraldy neǵurlym belsendi paıdalaný usynylady», - dedi Berik Sholpanqulov.
