Memlekettik satyp alý: Aqtóbede antıkor tekserý júrgizip, 1,045 mıllıard teńge únemdeldi

AQTÓBE. QazAqparat - Aqtóbe oblysy boıynsha Sybaılas jemqorlyqqa qarsy kúres departamenti memlekettik satyp alýdaǵy josparlanǵan jumystarǵa, qyzmetter men taýarlarǵa monıtorıng júrgizý barysynda eki elektromobıldi joǵary baǵamen satyp alý faktilerin anyqtady.

Bul týraly QazAqparat departamenttiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, júrgizilgen taldaý nátıjeleri boıynsha «Aqtóbe oblysy ákimdiginiń is basqarmasy» KMM elektromobıldiń bir birligin 38,9 mln. teńgege satyp alýdy josparlaǵany anyqtaldy. Al uqsas elektromobılderdiń ortasha naryqtyq quny shamamen 29 mln. teńgeni quraıdy.

Osyǵan baılanysty, Aqtóbe oblysy boıynsha ákimdikke usynymdar engizilip, sonyń negizinde memlekettik satyp alý týraly shart naryqtyq baǵalarǵa sáıkes keltirildi. Osylaısha, 18 mln. teńgeden astam somaǵa bıýdjet qarajatyn únemdeldi.

Sonymen qatar, Departament Áıteke bı jáne Baıǵanın aýdandary máslıhatynyń apparattary josparlaǵan biliktilikti arttyrý semınarlaryn uıymdastyrý boıynsha qyzmetterdiń tehnıkalyq erekshelikterine taldaý júrgizdi.

Taldaý barysynda bıýdjettik josparlaýdyń tıimsizdigi anyqtaldy jáne atalǵan máslıhattarǵa memlekettik satyp alýdy iske asyrý barysynda paıdalanylatyn bıýdjet qarajatyn ońtaıly jáne tıimdi jumsaý úshin usynymdar berildi.

Qazirgi ýaqytta joǵaryda atalǵan mekemeler osy qyzmetterdi satyp alýdan bas tartty.

Departamenttiń usynymdarynyń nátıjesinde jyl basynan beri 53 memlekettik organ men uıym memlekettik satyp alý jónindegi josparlaryn qaıta qarap, nátıjesinde memlekettik bıýdjettiń 1,045 mıllıard teńgege únemdelýine qol jetkizildi.

Antıkor memlekettik bıýdjet qarajatyn utymdy jumsaýǵa baǵyttalǵan is-sharalardy turaqty negizde iske asyrady.