Memlekettik satylymdar júıesiniń básekege qabilettiligin arttyrý jónindegi mańyzdy joba jasaldy

Búgin Astanada oryn alǵan halyqaralyq konferentsııada «Qazaqstan Respýblıkasy memlekettik satylym júıesin jetildirý men básekege qabilettiligin arttyrý» jobasynyń tanystyrylymy boldy.

Aıta ketelik, 2009 jyldyń 27 qazanynan bastaý alǵan joba sheńberinde Eýropalyq Odaq tarapynan qarjylandyrylǵan halyqaralyq sarapshylar toby QR Úkimetimen jáne QR Qarjy mınıstrligimen birlese memlekettik satylym júıesin jetildirý, onyń tıimdiligi men aıqyndyǵyn qamtamasyz etý jáne básekege qabilettiligin arttyrý baǵytyndaǵy sharalar keshenin júzege asyrǵan bolatyn. Jalpy bıýdjeti 1,2 mln. eýrony quraǵan joba Eýropalyq Odaq tarapynan qarjylandyryldy.

Atalmysh jobanyń negizgi maqsaty qarjylyq baqylaý komıtetine jáne memlekettik satylym salasyndaǵy ózge de organdarǵa otandyq memlekettik satylym júıesin jetildirý baǵytynda qoldaý kórsetý boldy.

Joba aıasynda Danııa, Latvııa, Estonııa, Italııa jáne Horvatııa elderiniń sarapshylary qazaqstandyq memlekettik satylym salasynyń qyzmetkerlerimen jumys júrgizip, tájirıbe almasty.

Joba jetekshisi Edvıns Parýpstyń málimdeýinshe, joba 3 baǵyt boıynsha júrgizildi: birinshiden, memlekettik satylymdar jónindegi QR zańdarynyń oryndalýyna saraptama júrgizý, ekinshiden, memlekettik satylymdar saıasaty boıynsha keńes berý, úshinshiden, memlekettik satylymdar salasynda jumys isteıtin memlekettik qyzmetkerlerdi oqytý. Edvıns Parýps atap ótkendeı, memlekettik qyzmetkerlerdi oqytý barysynda 30 maman daıyndyqtan ótti. Mamandardy oqytý Petropavl, Qyzylorda jáne Taldyqorǵan qalalarynda júrgizildi.

Joba sheńberinde QR ishki normatıvtik-quqyqtyq aktileri men quqyqtyq bazasyna ózgerister engizý jóninde 39 usynys jasaldy. Sonymen qatar, memlekettik qyzmetkerlerge arnalǵan memlekettik satylymdardy júzege asyrý jónindegi ádistemelik qural jaryqqa shyǵaryldy.