Memlekettik rámizdi qorlaǵandar qatań jazalanýy kerek - depýtat Baqytbek Smaǵul
ASTANA. 18 sáýir. QazAqparat - Qylmystyq kodekstegi memlekettik rámizderdi qorlaǵany úshin qarastyrylǵan jaýapkershilikti qatańdatý kerek.
Búgin Májilis Tóraǵasy Nurlan Nyǵmatýlınniń jetekshiligimen ótken palatanyń jalpy otyrysynda Úkimet basshysynyń, Memlekettik hatshynyń, Bas prokýrordyń atyna saýal joldaǵan depýtat Baqytbek Smaǵul osy máseleni kóterdi.
«Memleketimizge degen mahabbatymyz ben maqtanyshymyz memlekettik rásimden bastalady», - degen depýtat ótken aptada BAQ-ta eldigimizdiń nyshany men táýelsizdigimizdiń atrıbýty bolyp otyrǵan Memlekettik Týdyń qorlanýyna baılanysty aqparat bolǵanyn atap ótti. «Almaty oblysynyń ákimshilik ortalyǵy Taldyqorǵan qalasyndaǵy oblystyq ákimdik janynda Týymyzdan súıretpe qap jasasa, Atyraý oblysy Atyraý qalasyndaǵy oblystyq prokýratýra janynda qoqysty jınap jatqan top Memlekettik Týymyzdy qap retinde qoldanǵan. Osynyń bárine kýáger bola otyryp, beısharalyǵymyzǵa namysym keldi. Onyń aldynda kóp maqtanǵan Azııada jarysynda jankúıerlerimizdiń Týdy taban asty etip qorlaǵanyn respýblıka boıynsha másele etip kóterdik. Qostanaıdaǵy jarysta, Kýáıttegi halyqaralyq jarystaǵy marapattaýda Ánurannyń aýysqany taǵy bar. Ánurandy qoıyp Memlekettik Týdy talaq etp otyrǵanymyz ba. Túrki áleminiń tý tikken mekeni dep maqtanǵan eldigimiz osy ma? Bul bizdiń jaýapsyzdyǵymyz ba, álde saýatsyzdyǵymyz ba?», - deıdi B. Smaǵul.
Depýtattyń aıtýynsha, Qylmystyq kodekstiń 317 babynda Qazaqstan Respýblıkasynyń Memlekettik Týyn, Eltańbasyn, Ánuranyn qorlaý 200 aılyq eseptik kórsetkish pen 1000 AEK deıingi mólsherde aıyppul salýǵa ne 1 jylǵa deıingi merzimde bas bostandyǵynan aıyrýǵa jazalanady delingen. «Bul kúlkili másele. Sondyqtan 2013 jylǵa qaraı Qylmystyq kodeksti jańartý úrdisinde eń birinshi kezekte álgi 317 baptaǵy qylmystyq jaýapkershilikti qatańdatýymyz kerek», - dedi B. Smaǵul.
