Memlekettik rámizderge degen qurmet - elge, jerge Otanǵa degen qurmetti bildiredi - R. Halmýradov
ASTANA. 24 mamyr. QazAqparat - Memlekettik rámizderge degen qurmet - elge, jerge Otanǵa degen qurmetti bildiredi.
Búgin Májilistiń jalpy otyrysynda «Qazaqstan Respýblıkasynyń memlekettik rámizderi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» zań jobasyn talqylaý barysynda depýtat Rozaqul Halmýradov osylaı málim etti.
«Memlekettik rámizder qaı eldiń bolsa da eń basty qasıetti qundylyǵy. Sondyqtan bolar Tuńǵysh Prezıdent N. Nazarbaev óz sózinde «Biz táýelsizdigimizdiń nyshandaryn kózdiń qarashyǵyndaı saqtaýymyz kerek. Elimizdiń árbir azamaty Qazaqstannyń Týyn, Eltańbasy men Ánuranyn erekshe qurmetteýge mindetti. Óıtkeni, olar halqymyzdyń maqtanyshy, bizdiń eń kıeli qundylyǵymyz», degen bolatyn. Shyndyǵynda memlekettik rámizderge degen qurmetti árqaısymyz ózimizdiń júregimizge uıytyp, jastarymyzdyń qulaǵyna, júregine, sana-sezimine de sińirsek qana, olar Otanynyń naǵyz patrıoty bolyp ósedi», - dedi R. Halmýradov.
Depýtattyń aıtýynsha, memlekettik rámizderge degen qurmet - elge, jerge Otanǵa degen qurmetti bildiredi. Sol sebepti Kók Týymyz kógimizde jelbiregende, Ánuran oryndalǵanda tik turyp, oń qolymyzdy júrekke ustap tyńdaýdy nasıhattaý saıasattyń basymdyq baǵyty bolýy qajet.
«Bıyl memlekettik rámizderimizdiń qabyldanǵanyna 20 jyl tolady. Ony laıyqty atap ótýge qatysty is-sharalar jospary da bekitilgen. Búgingi qaralyp jatqan zań jobasy memlekettik rámizderdiń standarttaryn saqtaýǵa, durys paıdalanýǵa tárbıeleıdi. Bul memlekettik rámizderimizdiń qabyldanǵanyna 20 jyl tolýyna Parlament depýtattarynyń qosqan úlesi dep bilemin», - dedi R. Halmýradov.
