Memlekettik rámizderdiń qoldanysy keńeıedi
ASTANA. QazAqparat - Bul týraly Májiliste «Qazaqstan Respýblıkasynyń memlekettik rámizderi týraly» Konstıtýtsııalyq zańyna ózgerister men tolyqtyrýlar engizý týraly» zań jobasyn tanystyrý kezinde Mádenıet jáne sport mınıstriniń orynbasary Marat Ázilhanov habarlady. «Táýelsiz memlekettiń negizgi atrıbýttarynyń biri memlekettik rámizder bolyp tabylady. Osy oraıda táýelsizdik pen patrıotızm ıdeıasynyń kórkem beınesin memlekettik týymyzdan, eltańbamyzdan jáne ánuranymyzdan kóre alamyz. Memlekettik rámizderdi paıdalaný máselesi jasóspirimder men jastarǵa patrıottyq tárbıe berý jáne qazaqstandyq birtektilikti nyǵaıtý júıesiniń asa mańyzdy quramdas bóligi ekeni daýsyz. Osyǵan oraı, «Qazaqstan Respýblıkasynyń memlekettik rámizderi týraly» Konstıtýtsııalyq zańǵa memlekettik rámizderdiń paıdalaný tájirıbesin keńeıtýdi kózdeıtin ózgerister men tolyqtyrýlar engizý usynylyp otyr»,- dedi mınıstrdiń orynbasary Májiliste sóılegen sózinde.
Zań jobasymen memlekettik rámizderdi paıdalaný men nasıhattaý boıynsha Úkimet pen ókiletti organnyń quzyretin naqtylaıtyn, memlekettik rámizder kúniniń erejelerin daıyndaıtyn túzetýler engizilgen. Marat Ázilhanovtyń aıtýynsha, memlekettik rámizder kúnin merekeleý erejelerin bekitý Úkimettiń quzyretine kiredi. - Jyl saıyn 4 maýsym - memlekettik rámizder kúninde toılanatyn merekege mynadaı mindetti normalardy jańadan engizýdi usynyp otyrmyz: memlekettik ánuran oryndalyp, Qazaqstan Respýblıkasynyń memlekettik týy saltanatty jaǵdaıda kóteriledi; memlekettik ánurandy bir mezgilde oryndaýdy qamtamasyz etetin aktsııalar ótkiziledi; elimizdiń damýyna úles qosqan azamattar marapattalady; ártúrli baıqaýlar, vıktorınalar jáne t.b. is-sharalardy uıymdastyrylady; ákimshilik memlekettik qyzmetshiler saltanatty túrde ant beredi,- dep túsindirdi M. Ázilhanov.
Onyń aıtýyna qaraǵanda, memlekettik rámizder jáne geraldıkalyq belgiler máseleleri boıynsha sarapshylar keńesi qurylady. Sonymen qatar, zańnamalyq qujatta Qazaqstan aýmaǵynda qyzmet etetin sheteldik uıymdardyń týlaryn Qazaqstannyń memlekettik týymen birge qoldanýdy qarastyratyn normalar da engizilgen. Mádenıet jáne sport mınıstriniń orynbasary atalǵan zań jobasyn daıyndaý barysynda Ekonomıkalyq yntymaqtastyq jáne damý uıymyna (EYDU) múshe memleketterdiń ozyq tájirıbesi qoldanylǵanyn atap aıtty. Túptep kelgende, Májilis depýtattary «Qazaqstan Respýblıkasynyń memlekettik rámizderi týraly» Konstıtýtsııalyq zańyna ózgerister men tolyqtyrýlar engizý týraly» zań jobasyn biraýyzdan maquldady.
Ámirlan Álimjan
