Memlekettik rámizderdi paıdalaný máselelerin retteýge baǵyttalǵan zań jobasynyń jumys toby jemisti eńbek etti - B.Ertaev
ASTANA. QazAqparat - Májiliste qurylǵan jumys tobynyń otyrysynda «Qazaqstan Respýblıkasynyń memlekettik rámizderi týraly» Konstıtýtsııalyq zańǵa engiziletin túzetýler talqyǵa salyndy.
Zań jobasy Qazaqstan Prezıdenti Nursultan Nazarbaevtyń «Nur Otan» partııasynyń XVI sezinde «Barshaǵa birdeı osy zamanǵy memleket: bes ınstıttsıonaldyq reforma» jáne Qazaqstan halqy Assambleıasynyń HHII sessııasynda «Máńgilik El: bir el, bir taǵdyr» taqyryptarynda sóılegen sózderinde aıtylǵan tapsyrmalaryn iske asyrý maqsatynda ázirlengenin atap ótken jón.
Májilistiń Halyqaralyq ister, qorǵanys jáne qaýipsizdik komıtetiniń múshesi, jumys tobynyń jetekshisi, «Halyq Qaharmany», depýtat Baqytjan Ertaev: «Zań jobasy memlekettik rámizderdi paıdalaný máselelerin retteýge baǵyttalǵan. Jumys tobynyń músheleri bul zań jobasyn jan-jaqty zerdelep, jemisti eńbek etti. Depýtattar men komıtetter tarapynan jańa túzetýler usynyldy. Onyń bári qaraldy. Múddeli mınıstrliktiń ókilderi de bizdiń suraqtarymyzǵa tolyqqandy jaýap berdi»,- dedi. Jumys tobynyń músheleri zań jobasyn Salystyrma kestege engen baptar boıynsha jeke-jeke qarady. Jumys tobynyń otyrysyna qatysqan Májilis depýtattary Aldan Smaıyl, Jeksenbaı Dúısebaev, Shavhat Ótemisov, Nurtaı Sabılıanov, Serikbaı Nurǵısaevtar salystyrma kestege engizilgen túzetýlerdi sarapqa saldy. Jumys tobynyń jetekshisi B.Ertaev zań jobasyn talqylaýda belsendilik tanytqan áriptesterine, mınıstrlik ókilderine jáne Májilis Apparatynyń qyzmetkerlerine rızashylyǵyn bildirdi.
