Memlekettik rámizderdi qorlaǵandarǵa aıyppul mólsheri 9,5 mln teńge bolmaq

NUR-SULTAN. QazAqparat – Memlekettik rámizderdi qorlaǵandarǵa salynatyn aıyppul mólsherin 3 myń AEK-ke deıin ulǵaıtý máselesi pysyqtalyp jatyr. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

Aıta keteıik, Úkimet basshysyna depýtattyq saýal joldaǵan senatorlar memlekettik rámizderdi qorlaý boıynsha zań baptaryn barynsha qataıtýdy, belgilengen aıyppul mólsherin eki ese kóbeıtýdi jáne jaza merzimin 5 jylǵa deıin uzartýdy talap etken bolatyn.

«Qazirgi ýaqytta Qazaqstan Respýblıkasy Qylmystyq kodeksiniń «Memlekettik rámizderdi qorlaý» týraly 372-babynda kózdelgen jaýapkershilikti qatańdatýdy, sonyń ishinde eń joǵary aıyppuldy 2 000-nan 3 000 aılyq eseptik kórsetkishke deıin ulǵaıtý jáne qoǵamdyq jumystarǵa tartýdyń eń uzaq merzimin 600-den 900 saǵatqa deıin ulǵaıtý boıynsha túzetýlerdi múddeli memlekettik organdar pysyqtap jatyr», - delingen Álıhan Smaıylovtyń jaýabynda.

Esterińizge sala keteıik, 2022 jyldyń 1 sáýirinen elimizdegi 1 AEK - 3 180 teńge. Demek, endigi ýaqytta memlekettik rámizderdi qorlaǵandar 9 540 000 teńge mólsherinde aıyppul tóleýge májbúr bolady.