Memlekettik rámizderdi daıyndaý, paıdalaný jáne qorǵaý tutastaı ulttyq másele bolýy shart - A. Smaıyl
ASTANA. 24 mamyr. QazAqparat - Memlekettik rámizderdi daıyndaý, paıdalaný jáne qorǵaý tutastaı ulttyq másele bolýy shart.
Búgin Májilistiń jalpy otyrysynda «Qazaqstan Respýblıkasynyń memlekettik rámizderi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» zań jobasyn talqylaý barysynda depýtat Aldan Smaıyl osyndaı pikir bildirdi.
Toqtala ketetin jaıt, zań jobasynda qarastyrylǵan memlekettik rámizderdiń daıyndalýyn lıtsenzııalaýdy joıý týraly Úkimettiń usynysyn depýtattar qoldamaǵan bolatyn. Osy máselege túsinik bere kele depýtat Aldan Smaıyl memlekettik Tý, Ánuran men Eltańba halyqtyń ary, namysy ekendigin aıtyp, sol úshin mundaı kıeni daıyndaý, paıdalaný jáne qorǵaý tutastaı ulttyq másele bolyp tabylatynyn jetkizdi.
«Sondyqtan da, biz «Tý men Eltańba tek lıtsenzııa arqyly ǵana jasalýy tıis» degen bapty durys saqtap qaldyq. Naryq bárin baǵyndyrmaýy tıis, naryqty ózine baǵyndyratyn qundylyqtar da bar. Bular: Tý, Eltańba men Ánuran hám solardyń máni men mazmunyna aınalǵan ulttyq sezim, ultyq murat pen ulttyq qadir-qasıet. Sondyqtan da, zań jobasyn biraýyzdan maquldaýymyz kerek», - deıdi depýtat Aldan Smaıyl.
