Memlekettik rámizder týraly qujattar kóshirmesi jarııalandy

NUR-SULTAN. QazAqparat - Memlekettik rámizderi kúnine oraı Qazaqstan Respýblıkasynyń Ulttyq arhıvi Qazaqstannyń basty atrıbýttary – Tý, Eltańba, Ánurannyń qalyptasý tarıhynan syr shertetin qyzyqty qujattar toptamasyn usynady, dep habarlaıdy QazAqparat.

Táýelsiz Qazaqstannyń Memlekettik týy resmı túrde 1992 jyly qabyldandy. Onyń avtory – belgili sýretshi Sháken Nııazbekov.

Qazaqstan Respýblıkasynyń Ulttyq arhıvinde saqtalǵan Qazaqstannyń Memlekettik týy resmı túrde 1992 jyly qabyldanýy týraly qujattar kóshirmesi.

Qazaqstan Respýblıkasynyń Ulttyq arhıvinde saqtalǵan Qazaqstannyń Memlekettik týynyń syzbasy.

Egemendi Qazaqstannyń Eltańbasy 1992 jyly resmı túrde qabyldandy. Onyń avtorlary – belgili sáýletshiler Jandarbek Málibekov pen Shot-Aman Ýálıhanov.

Qazaqstan Respýblıkasynyń Ulttyq arhıvinde saqtalǵan Qazaqstannyń Eltańbasy 1992 jyly resmı túrde qabyldanýy týraly qujattar kóshirmesi.

Qazaqstan Respýblıkasynyń Ulttyq arhıvinde saqtalǵan Qazaqstannyń Eltańbasy syzbasy.

Táýelsiz Qazaqstannyń tarıhynda elimizdiń memlekettik gımni eki ret – 1992 jáne 2006 jyldary bekitildi.

Respýblıka memlekettik egemendigin ıelengennen keıin, 1992 jyly Qazaqstan ánuranynyń mýzykasy men mátinine baıqaý jarııalandy. Baıqaý qorytyndysy boıynsha Qazaq KSR gımniniń mýzykalyq redaktsııasyn saqtaý týraly sheshim qabyldandy. Osylaısha táýelsiz Qazaqstannyń alǵashqy gıminiń mýzykasynyń avtorlary Muqan Tólebaev, Evgenıı Brýsılovskıı jáne Latıf Hamıdı boldy. Sonymen qatar, úzdik mátinge jarııalanǵan baıqaýda avtorlar ujymy, belgili aqyndar Muzafar Álimbaev, Qadyr Myrzalıev, Tumanbaı Moldaǵalıev jáne Jadyra Dáribaeva jeńip shyqty.

Eldiń dybystyq rámiziniń tanymaldyǵyn arttyrý maqsatynda 2006 jyly jańa memlekettik gımn qabyldandy. Onyń negizi retinde halyqtyń arasynda keńinen tanymal «Meniń Qazaqstanym» patrıottyq áni tańdap alyndy. Ol ándi Shámshi Qaldaıaqov 1956 jyly Jumeken Nájimedenovtiń sózine jazǵan bolatyn. Qazaqstannyń Tuńǵysh Prezıdenti - Elbasy Nursultan Nazarbaev ánge memlekettik gımn joǵary mártebesin berý jáne anaǵurlym saltanatty shyrqalýy úshin mýzykalyq týyndynyń bastapqy mátinin óńdedi. Qazaqstan Parlamenti 2006 jyly 6 qańtarda palatalardyń birlesken otyrysynda «Memlekettik rámizder týraly» Jarlyqqa tıisti túzetý engizip, elimizdiń jańa memlekettik gımnin bekitti.

Qazaqstan Respýblıkasynyń Ulttyq arhıvinde saqtalǵan Qazaqstan gımniniń 1992 jylǵy resmı túrde qabyldanýy týraly qujattar kóshirmesi.