Memlekettik rámizder kúnine oraı Almatyda qandaı sharalar ótedi

ALMATY. QazAqparat – Almatyda QR Memlekettik rámizder kúnine oraı qaladaǵy kóptegen nysandar merekege saı bezendirildi, dep habarlaıdy QazAqparat tilshisi.

Qalalyq Mádenıet basqarmasy merekege baılanysty qalanyń 8 aýdanynda túrli mádenı sharalar uıymdastyrǵan.

Atap aıtqanda, búgin Rysqulov pen Áshimov kósheleriniń qıylysynan bastap baıkerler ánurandy shyrqap, Rysqulov-Momyshuly-Móńke bı- Saın kóshelerin aralap kelip «Almaty Arena» janyna toqtaıdy.

Sondaı-aq, ár aýdandaǵy turǵyn úı keshenderinde Qazaqstan Respýblıkasynyń týy kóterilip, ánuran shyrqalady.

Odan bólek, túrli ult ókilderi men mamandyq ıeleri arasynda memlekettik ánurannyń onlaın fleshmoby ótedi.

Búgin Dostyq dańǵylynda Qazaqstan qonaq úıinde «Meniń týym» memlekettik aktsııasy josparlanǵan.

Keshki 16:00 shamasynda Abaı kóshesinde Memlekettik týdy kótergen avtosherý ótedi.

Sonymen qatar, «Premera» TK, «Shuǵyla» shaǵyn aýdanynda turǵyndar saltanatty túrde ánurandy oryndaıdy.

Sondaı-aq búgin Almaty ákimi Baqytjan Saǵyntaev Twitter -degi paraqshasynda qala turǵyndary men qonaqtaryn Memlekettik rámizder kúnimen quttyqtady.

«Memlekettik rámizder kúnimen quttyqtaımyn! Barlyq qıyndyqty birge eńserip, qýanyshqa sebep kóp bolsyn. Týǵan qalamyz ben Otanǵa degen mahabbatymyzdy ónegeli isterimiz jáne qol jetkizgen bıik jetistikterimiz arqyly kórseteıik», - dep atap ótti ákim.

Aıta ketý kerek, osydan týra 28 jyl buryn, naqty aıtqanda 1992 jyldyń 4 maýsymynda QR Tuńǵysh Prezıdenti - Elbasy Nursultan Nazarbaev «Qazaqstan Respýblıkasynyń Memlekettik týy týraly», «Qazaqstan Respýblıkasynyń Memlekettik eltańbasy týraly» jáne «Qazaqstan Respýblıkasy Memlekettik ánuranynyń mýzykalyq redaktsııasy týraly» Zańdarǵa qol qoıǵan edi. Al «Qazaqstan Respýblıkasynyń Memlekettik rámizderi týraly» Konstıtýtsııalyq Zań 2007 jyly 4 maýsymda qabyldandy. Osy Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi.