Memlekettik rámizder kúni: Kókshetaýda «Jyl patrıottary» syılyǵynyń nomınanttary marapattaldy

KÓKShETAÝ. QazAqparat - Kókshetaýda Memlekettik rámizder kúnine arnalǵan patrıottyq aktsııasy ótti, dep habarlaıdy QazAqparat tilshisi.

Oblys ortalyǵyndaǵy týtyǵyrda ótken merekelik sharaǵa oblys turǵyndary, úkimettik emes uıymdardyń ókilderi jáne jastar qatysty.

Jınalǵandar aldynda aımaq basshysy Ermek Marjyqpaev quttyqtaý sóz sóılep, Táýelsizdigimizdiń basty nyshany - Memlekettik rámizderdiń mańyzdylyǵyn atap ótti.

«Osydan otyz bir jyl buryn bizdiń elimiz memlekettik rámizderdi qabyldady jáne bul kún jas egemen memlekettiń mańyzdy oqıǵalarynyń birine aınaldy. Qazaqstan Respýblıkasynyń Týy, Eltańbasy men Ánurany – kez-kelgen memlekettiń bolmysyn, saıası táýelsizdigi men egemendigin beıneleıtin, Otanǵa qyzmet etýdiń, halqynyń tarıhı tamyry men dástúrin qurmetteýdiń bıik murattaryn qamtıtyn ajyramas atrıbýttary bolyp tabylady», - dedi quttyqtaý sózinde aımaq basshysy.

Aktsııa barysynda «Jyl patrıottary» syılyǵynyń nomınanttaryn marapattaý rásimi ótti. Olardyń qatarynda erligimen kózge túskender, eriktiler jáne halyqaralyq ǵylymı, mádenı jáne sporttyq baıqaýlar men festıvalderdiń jeńimpazdary bolǵan jıyrmaǵa jýyq aqmolalyq boldy.

«Men óz eliminiń patrıotymyn, elimizdiń atynan Afına men Máskeýde ótken halyqaralyq jarystarda qatysý men úshin zor mártebe», - dep bólisti Qosshy qalasyndaǵy «Dara» bıznes akademııasynyń oqýshysy, Afınadaǵy «WADA – 2023» Ashyq álem chempıonatynyń jeńimpazy, Máskeýdegi Halyqaralyq bı olımpıadasynyń laýreaty, akrobatıkalyq bıden Qazaqstan Respýblıkasy chempıonatynyń birneshe dúrkin júldegeri, segiz jasar Ahmet Leıla.

Saltanatty sharanyń sońy jergilikti shyǵarmashylyq ujymdardyń oryndaýyndaǵy merekelik kontsertke ulasty.

Aıta ketsek, budan buryn «Aqmola juldyzdary» oblystyq shyǵarmashylyq baıqaýynyń jeńimpazdary marapattalǵanyn jazǵan edik.

foto: Ákimdiktiń baspasóz qyzmetinen