Memlekettik rámizder kúni: Aqtaýda motosherý ótti

AQTAÝ. QazAqparat - Aqtaýda QR Memlekettik Rámizder kúnine oraı motosherý ótti, dep habarlaıdy QazAqparat tilshisi.

Rámizder kúnine oraı 2 maýsymnan beri «AMANAT» partııasy «Jastar Rýhy» JQ Mańǵystaý oblystyq fılıalynyń uıymdastyrýymen birqatar is-sharalar ótti. Munaıly aýdany Batyr aýylynda 200-ge jýyq turǵyn ánuran shyrqady. Aqtaý qalasynyń jastary «Amfıteatr» alańynda «Atameken», «Kók týdyń jelbiregeni» atty patrıottyq ánderdi aıtyp, kópshiliktiń nazaryn aýdardy. Al búgin 4 maýsym kúni 12 motobaıker men 20-dan astam jeńil kólik júrgizýshileri kók baıraqty jelbiretip, 1 saǵat kóleminde qalany aralady.

Uıymdastyrýshylardyń aıtýynsha, bul shara jastardy otansúıgishtikke tárbıeleýge baǵyttalǵan.

«Barshańyzdy Memlekettik Rámizder kúnimen quttyqtaımyn. Táýelsizdigimizdiń tumaryna aınalǵan kók týymyz kógimizde jelbiresin. Eltańbamyz ulyqtalyp, ánuranymyz izgi uǵymdardyń rýhanı jarshysy retinde shyrqala bersin» - dedi Abzal Marat «AMANAT» partııasy «Jastar Rýhy» JQ Mańǵystaý oblystyq fılıalynyń tóraǵasy

Sonymen qatar Abzal Marattyń aıtýynsha, bul ıgi sharaǵa qala turǵyndary da belsendi qatysqan.

«Men qala turǵyny retinde Rámizder kúnin erekshe atap ótýdi jón sanadym. Óıtkeni bul patrıottyq rýhty kóterip, ulttyq namysty ulyqtaıtyn mereke. Halqymyzdyń táýelsizdik nyshandaryna degen qurmeti asa zor. Birligi myqty, yntymaǵy jarasqan el bolaıyq», - dedi Sabyr Serjan.