Memlekettik rámizder qazaq halqynyń ǵasyrlar boıǵy erkindik pen táýelsizdik týraly armanyn bildiredi - Q.Saýdabaev
ASTANA. 22 jeltoqsan. QazAqparat /Marlan Jıembaı/ - Memlekettik rámizder qazaq halqynyń ǵasyrlar boıǵy erkindik pen táýelsizdik týraly armanyn bildiredi.
Bul pikirdi búgin QR Memlekettik hatshysy Qanat Saýdabaev Memlekettik rámizder jónindegi respýblıkalyq komıssııanyń otyrysynda bildirdi.
«Memlekettik tý, Memlekettik eltańba, Memlekettik ánuran - kez kelgen egemen eldiń mindetti atrıbýttary bolyp tabylady. Sondyqtan da qazaqstandyq jas urpaqty tárıbeleý jáne patrıottyq sezimdi qalyptastyrýda elimizdiń memlekettik rámizderine erekshe kóńil bólinedi», - dep atap ótken Q.Saýdabaev Elbasynyń «Memlekettik rámizder - bizdiń elimizdiń, táýelsizdigimizdiń ajyramas bóligi», degen sózin jıynǵa qatysýshylardyń esine saldy.
Onyń paıymynsha, memlekettik rámizderge degen kózqaras, memlekettik organdardyń olardy nasıhattaý jumystarynyń tıimdiligi qazaqstandyqtardyń jalpy patrıottyq deńgeıin anyqtaıdy.
Jıyn barysynda Baılanys jáne aqparat, Kólik jáne kommýnıkatsııa mınıstrleriniń memlekettik rámizderdi paıdalaný jáne nasıhattaý jónindegi jumystary týraly esepteri tyńdaldy.
Qorytyndysynda «QR Memlekettik rámizderi týraly» Qazaqstan Respýblıkasynyń Konstıtýtsııalyq zańyn buljytpaı saqtaý jóninde naqty tapsyrmalar men usynystar berildi.
