Memlekettik órtke qarsy qyzmet qabyldaǵan sharalar nátıje bermeı otyr - mınıstr
ASTANA. QazAqparat - Memlekettik órtke qarsy qyzmet qabyldaǵan sharalar aıtarlyqtaı nátıje bermeı otyr. Bul týraly búgin Úkimet otyrysynda QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Elimizde jalpy órt máselesi kúrdeli jaǵdaıda. Memlekettik órtke qarsy qyzmettiń jáne jergilikti atqarýshy organdardyń qabyldap jatqan sharalary aıtarlyqtaı nátıje bermeı otyr. Sońǵy jyldary elimizde jyl saıyn 15 myńnan astam órt tirkeledi. Byltyr órtten 846 adam zardap shekti. Onyń ishinde 434-i qaıtys boldy. Tikeleı órtten kelgen materıaldyq zalal 3 mlrd teńgeden asty», - dedi mıınstr.
Bul rette onyń dereginshe, ótken jyly órten qaza tapqan adamdar sany Atyraýda 2 ese, Almaty qalasynda, ShQO, Pavlodar oblystarynda 25 paıyzǵa, Jambyl oblysynda 8 paıyzǵa artqan.
«Órttiń 60 paıyzdan astam turǵyn úı sektoryna tıesili. Onyń 40 paıyzy halyqtyń otty abaısyz paıdalanýynan, 20 paıyzy peshti paıdalaný barysynda órt qaýipsizdigin saqtamaýdan jáne 16 paıyzy elektr jabdyqtarynan oryn alǵan. Qysqy maýsymǵa daıyndyq aıasynda biz ótken jyldyń qyrkúıeginde jáne jeltoqsanynda órt qaýipsizdigi aılyǵy der ýaqytynda ótkizildi. Nátıjesinde 2018 jyldyń qarasha-jeltoqsanynda jáne osy jyldyń qańtarynda órt sanynyń 2 paıyzǵa, adam óliminiń 27 paıyzǵa tómendeýi baıqalady», - dedi Q.Qasymov.
Degenmen, onyń aıtýynsha, aqpan aıynyń alǵashqy on kúninde órtten 18 adam, onyń ishinde 5 bala jáne ıisten 6 adam qaza tapqan.
