Memlekettik orman rezervattary aýmaǵynda aǵash tiletin qurylǵylar ornatýǵa tıym salynady - zań jobasy
ASTANA. 23 qarasha. QazAqparat /Qanat Mámetqazyuly/ - Memlekettik orman rezervattary aýmaǵynda aǵash tiletin qurylǵylar ornatýǵa tıym salynady.
Bul týraly QR Parlamenti Májilisinde «Qazaqstan Respýblıkasynyń keıbir zańnamalyq aktilerine orman sharýashylyǵy, janýarlar dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
«Qujat boıynsha memlekettik tabıǵı rezervattardyń kúzet aımaqtarynda aǵashtardy tiletin qurylǵylardy ornatýǵa tıym salý normalary engizilip otyr. Buǵan deıin, qoldanystaǵy zańnamada álgindeı qurylǵylardy ornatýǵa shekteý normalary qarastyrylmaǵan edi. Sonyń saldarynan orman rezervattarynyń kúzet aımaqtarynda, atap aıtqanda Ertis óńiri ormandarynda zańsyz aǵash kesý jáne sol maqsatta bórenelerdi tiletin qurylǵylar men stanoktar ornalastyrylǵan jaǵdaılar da oryn alǵan edi. Endigi kúni bul norma qabyldansa, orman rezervattaryna aǵash tiletin qurylǵy ornatýǵa tolyq shekteý qoıylady», - dedi qujatty tanystyrǵan Aýyl sharýashylyǵy vıtse-mınıstri Marat Orazaev.
Zań jobasymen sondaı-aq erekshe qorǵalatyn tabıǵı aýmaqtar salasyndaǵy ýákiletti memlekettik organnyń Qazaqstan Respýblıkasynyń Qyzyl kitabyn júrgizý jáne basyp shyǵarý jónindegi quzyreti aıqyndaldy jáne keńeıtildi. Budan basqa, memlekettik ulttyq tabıǵı parkteriniń shekteýli sharýashylyq aımaǵynda áýesqoılyq (sporttyq) balyq aýlaýdy, melıoratıvtik balyq aýlaýdy, ǵylymı-zertteý maqsatynda balyq aýlaýdy jáne ósimin molaıtý maqsatynda balyq aýlaýdy júzege asyrýǵa múmkindik beretin norma engizildi. Mamandardyń aıtýynsha, bul ulttyq tabıǵı parkterdiń sý bógenderinde balyq qorlaryn saqtaýǵa jáne kóbeıtýge járdemdesip qana qoımaı, respýblıkalyq bıýdjetke qosymsha qarjy qarajatynyń túsýin qamtamasyz etedi.
