Memlekettik organdardyń saıtyndaǵy qazaq tilindegi aqparat orys tiline qaraǵanda eki esege deıin az - M. Ábenov
ASTANA. Naýryzdyń 1-i. QazAqparat /Qanat Mámetqazyuly/ - Memlekettik, atqarýshy organdardyń saıttaryndaǵy qazaq tilindegi aqparat orys tiline qaraǵanda eki esege deıin az. Búgin QR Parlamenti Májilisinde ótken Úkimet saǵatynda depýtat Murat Ábenov osylaı málim etti,
dep habarlaıdy QazAqparat.
«Búgingi kúni qazaq tilinde, memlekettik tilde qyzmet kórsetetin ınternet jelileri múldem jetkiliksiz, óte az sandy qurap otyr. Bul elimizdegi barlyq tirkelgen, jumys istep turǵan saıttardyń 1 paıyzyna ǵana teń. Qazaqstanda tirkelgen saıttardyń basym bóligi, meıli ol resmı organnyń saıty bolsyn, meıli kommertsııalyq qurylym bolsyn, oryssha jumys isteıdi. Buǵan syrttan qosylatyn orys tildi saıttardy qosyńyz. Budan bólek, «elektrondyq úkimet» veb-portalyndaǵy materıaldardyń basym bóligi negizinen orys tilinde júrgiziledi. Al memlekettik satyp alý portalynda negizgi betinde qazaqsha aqparat bolǵanymen, qalǵan barlyq habarlamalar osy ýaqytqa deıin tek qana orys tilinde júrgizilip keledi. Endeshe, memlekettik satyp alýlar úderisine qatysam deýshiler ol boıynsha memlekettik tilde birde-bir aqparat ala almaıdy degen sóz. Bunyń ózi zań buzýshylyqqa jatady», dedi M. Ábenov.
Sonymen birge, depýtat Aqparattandyrý jáne baılanys agenttiginiń qoldaýymen júzege asqan jobalardyń da basym bóligi memlekettik tilge kelgende aqsap qalatynyn alǵa tartty. Onyń aıtýynsha, Agenttiktiń qoldaýymen engizilgen «Kaztub» ulttyq oıyn-saýyq beıne portalynda, sol sekildi memlekettik organdardyń birqatar saıttarynda qazaqsha «izdeý» múldem jumys istemeıdi. «Bunyń ózi elimizdegi ınternet-jobalardyń ádettegishe aldymen orys tilinde ázirlenetinin, sosyn keıin ǵana aýdarylatynyn bildiredi. Sol sebepti memlekettik tilge qatysty qazaqstandyq ınternet segmentinde úlken kemshilikter oryn alyp otyr. Jalpy, memlekettik, atqarýshy organdardyń saıttaryndaǵy qazaq tilindegi aqparattar orys tiline qaraǵanda eki esege deıin az. Buny durystaý qajet», dedi M. Ábenov.
