Memlekettik organdardyń saıttary jabylady

ASTANA. QazAqparat - QR Aqparat jáne kommýnıkatsııalar mınıstri Dáýren Abaev memlekettik organdardyń saıttaryn bir portalǵa shyǵarý jumysy týraly aıtyp berdi, dep xabarlaıdy QazAqparat tilshisi.

"Bıyl biz memlekettik organdardyń biryńǵaı ınternet portalyn jasaımyz. Júzdegen saıttardyń ornyna bir portal bolady. Oǵan aýdandyq ákimdikterge deıin barlyq memlekettik organdar shyǵarylady. Osylaısha, qazirgi saıttardy qarjylandyrý toqtatylady. Barlyǵy bir portalda otyrady. Qazirgi kezde biz ony synaqtan ótkizip jatyrmyz. Shamamen, sáýir aıynda biz ony xalyqqa kórsete alamyz", - dedi D.Abaev jýrnalısterge bergen suxbatynda.

Mınıstrdiń aıtýynsha, portalda barlyq mınıstrlikter men ákimdikterdiń aqparaty jarııalanady. Al arnaıy bólim ol aqparattyń jańarýyn qadaǵalap otyrady. "Portal "gov.kz" dep atalady. Eki jyldyń ishinde biz birtindep barlyq memlekettik saıttardy jaýyp tastaımyz. Sonyń arqasynda 1 mıllıard teńgeni únemdep otyrýǵa bolady. Biz Ulybrıtanııanyń tájirıbesin aldyq. Ol jaqta barlyq memlekettik organdardyń biryńǵaı portaly bar. Sonda memorgan texnıkalyq qyzmetke jaýap bermeıdi, tek óz aqparatyn ǵana berip otyrady", - dep atap kórsetti D.Abaev.

Aıta keteıik, buǵan deıin biryńǵaı portaldyń jasalatyny týraly "Ulttyq aqparattyq texnologııalar» AQ basqarma tóraǵasy Áset Turysov ta aıtqan edi. Onyń sózine qaraǵanda, búginde san alýan memorgandardyń 296 saıty jumys isteıdi. Olardyń ishinde ortalyq jáne jergilikti atqarýshy organdar bar. «Basqarmalar, komıtetter jáne taǵy basqa organdardyń saıttarynda san alýan aqparat jarııalanady. Al ol saıttardyń bárin ustap turýǵa bıýdjetten qyrýar qarjy bólinedi. Halyq bolsa, ózine qajetti aqparatty bólek-bólek izdep jatady. Búginde egov - elektrondy úkimet portaly bar. Biz arnaıy platformany iske qosatyn bolamyz. Sonyń negizinde barlyq memlekettik organdardyń saıttary biriktiriledi. Artynan ony egov-qa qosyp qoıamyz. Sol kezde azamattar bir saıtqa kirip, barlyq qajetti aqparatty bir jerden taba alady. Memlekettik qyzmetten bastap salalyq aqparatqa deıingi barlyq kontent bolady. Ákimdikke qarasty basqarmalardyń saıttaryna deıin barlyǵy bir júıege qosylady», - dedi Á.Turysov Astanada ótken baspasóz máslıxatynda.

Onyń aıtýynsha, atalǵan bastama boıynsha tıisti jumystar bastalyp ketti. Birinshi kezeńde tórt mınıstrliktiń saıty bir arnaǵa qosylady. Osynyń arqasynda qyzmet kórsetýdi jeńildetip qana qoımaı, bıýdjettiń biraz qarajatyn da únemdeýge bolady.