Memlekettik organdardyń nashaqorlyqqa jáne esirtki bıznesine qarsy is-qımylyn úılestirý jónindegi vedomstvoaralyq shtabynyń otyrysy ótti
ASTANA. 28 qyrkúıek. QazAqparat - Búgin Іshki ister mınıstri Qalmuhanbet Qasymovtyń tóraǵalyq etýimen Memlekettik organdardyń nashaqorlyqqa jáne esirtki bıznesine qarsy is-qımylǵa baǵyttalǵan qyzmetin úılestirý jónindegi vedomstvoaralyq shtabynyń ekinshi otyrysy ótkizildi.
Bul týraly Qazaqstan Respýblıkasy ІІM Esirtki bıznesine qarsy kúres jáne esirtki aınalymyn baqylaý komıtetiniń baspasóz qyzmeti habarlady.
Otyrysta Qaýipsizdik Keńesi Hatshylyǵynyń esirtki bıznesine qarsy kúres jónindegi tamyzdaǵy tapsyrmasynyń oryndalýy, úkimettik esirtkige qarsy kúrestiń 2012-2016 jyldarǵa arnalǵan salalyq baǵdarlamasyn iske asyrý barysy, esirtkige qarsy salada jergilikti atqarýshy organdardyń qyzmetin baǵalaý ádistemesin ázirleý nátıjeleri jáne basqa da birqatar máseleler qaraldy.
ІІM Esirtki bıznesine qarsy kúres komıteti tóraǵasynyń orynbasary Janat Bıtenov Keden odaǵynyń elderimen Esirtki quraldarynyń tizimin birizdendirý barysy týraly, onyń ishinde esirtki salmaǵynyń biryńǵaı mólsherin belgileý jóninde habarlady.
Qazaqstandyq zańnamaǵa sáıkes esirtkiniń jekelegen túrleriniń krımınaldyq salmaǵynyń joǵarǵy shegi Keden odaǵy elderinde belgilengen uqsas parametrlerden edáýir asady. Osyǵan baılanysty osy máseleni odan ári pysyqtaý maqsatqa saı bolyp tabylady.
Esirtkige qarsy halyqaralyq yntymaqtastyqty paıdalaný esirtki qaýpine qarsy keshendi is-qımyl jasaýǵa jáne Ortalyq Azııa óńirinde esirtkige qarsy beldeý qurýǵa jaǵdaı týǵyzatynyn, al osy ózara yntymaqtastyqty damytý osy qyzmettiń tıimdiligin arttýǵa múmkindik beretindigin aıtty Komıtet tóraǵasynyń orynbasary.
Sondaı-aq, balamalyq jazalaý nysandaryn zańnamalyq retteý jáne esirtki qylmysy úshin jazalaýdyń qosymsha túrlerin qoldaný praktıkasy talqylandy. Nashaqorlyqtyń aldyn alý, onyń ishinde jastar arasyndaǵy nashaqorlyqtyń aldyn alý sharalarynyń tıimdiligin arttyrý máseleleri qaraldy.
Otyrysta memlekettik organdardyń Qazaqstan Respýblıkasynda nashaqorlyqqa jáne esirtki bıznesine qarsy kúrestiń 2012-2016 jyldarǵa arnalǵan salalyq baǵdarlamasynyń oryndalý barysy boıynsha BǴM Jastar isteri jónindegi komıtet tóraǵasynyń orynbasary 2012 jyldyń birinshi jarty jyldyǵynda stýdentter men oqýshylar úshin ótkizilgen birqatar profılaktıkalyq is-sharalardyń, sondaı-aq jasóspirimder arasynda esirtkige qarsy baǵyttalǵan aýlalyq klýbtardyń bazasynda ótkizilip júrgen trenıng-sabaqtardyń tıimdiligin atap ótti.
Sonymen qatar otyrysta nashaqorlyqqa jáne esirtki bıznesine qarsy kúreste jergilikti atqarýshy organdardyń qyzmetin baǵalaýdy júrgizý ádistemesi talqylandy.
Onyń barysynda ІІM Esirtki bıznesine qarsy kúres komıteti ázirlegen joǵaryda atalǵan Baǵdarlamada kózdelgen nashaqorlyqqa jáne esirtki bıznesine qarsy kúreste jergilikti atqarýshy organdardyń qyzmetin baǵalaý ádistemesi maquldandy. Ol memlekettik organdardyń birlesken buıryǵymen taıaýda bekitilmek.
Otyrys qorytyndysy boıynsha múddeli memlekettik organdarǵa nashaqorlyqqa jáne esirtki bıznesine qarsy baǵyttalǵan is-sharalardy sapaly jáne tıimdi uıymdastyrý, Qaýipsizdik Keńesi Hatshylyǵynyń tapsyrmalaryn jáne Salalyq esirtkige qarsy baǵdarlamany ýaqtyly jáne nátıjeli oryndaý boıynsha naqty usynymdar berildi.
