Memlekettik organdardyń qyzmetin básekelestik ortaǵa berý AQSh tájirıbesin eskere otyryp júzege asyrylady

ASTANA. QazAqparat - Memlekettik organdardyń qyzmetin básekelestik ortaǵa berý AQSh tájirıbesin eskere otyryp júzege asyrylady. Bul týraly búgin QR Parlamenti Májilisi Ekonomıkalyq reforma jáne óńirlik damý komıtetiniń keńeıtilgen otyrysynda Ulttyq ekonomıka birinshi vıtse-mınıstri Marat Qusaıynov málim etti.

«Ult josparynyń 97 qadamyna sáıkes ózin ózi retteý jáne jergilikti ózin ózi basqarýdy damytý arqyly sheshim qabyldaý protsesine azamattardyń qatysý múmkinshiligin keńeıtý, sonymen qatar memleketke tán emes qyzmetterdi básekelestik orta men ózin ózi retteıtin uıymdarǵa berý qarastyrylǵan. Bul qadamdy júzege asyrý barysynda álemdik úzdik tájirıbe zerdelendi. Buǵan qosa AQSh-tyń qoldanystaǵy ádisteri negizge alyndy», - dedi M.Qusaıynov.

Onyń sózine qaraǵanda, AQSh-tyń Bıliktiń federaldy organdarynyń qyzmetin túgendeý týraly zańyna sáıkes jyl saıyn memlekettik qyzmetke tán emes jáne jeke kompanııalar da júzege asyra alatyn qyzmetter anyqtalyp otyrady. Bul jumystar turaqty túrde júrgiziledi.

Osy rette M.Qusaıynov aǵymdaǵy jyldyń 30 qańtarynda Premer-Mınıstrdiń orynbasary Darıǵa Nazarbaeva tóraǵalyq etetin memlekettik organdardyń qyzmetterin básekelestik ortaǵa jáne ózin ózi retteıtin uıymdarǵa berý máseleleri boıynsha usynystar ázirleý úshin komıssııa qurylǵan. Aǵymdaǵy jyldyń 20 sáýirdegi komıssııanyń hattamalyq tapsyrmasyna sáıkes Ulttyq ekonomıka mınıstrligi Parlament Májilisi depýtattary, Ulttyq kásipkerler palatasy jáne Qazaqstannyń Azamattyq alıansy ókilderimen birlesip ázirlegen bazalyq ádister maquldandy.