Memlekettik organdardyń birqatar fýnktsııalaryn úkimettik emes uıymdarǵa berý qajet - N. Erimbetov

ASTANA. 6 qyrkúıek. QazAqparat - Memlekettik organdardyń birqatar fýnktsııalaryn úkimettik emes uıymdardyń qyzmettik aıasyna aýystyrý qajet. Bul týraly búgin Astanada «Memlekettik áleýmettik tapsyrys aıasynda uzaqmerzimdi áleýmettik baǵdarlamalardy júzege asyrý jáne monıtorıng jasaý» atty konferentsııada «Samuryq-Qazyna» UÁQ Áleýmettik áriptestik ortalyǵynyń basshysy Nurlan Erimbetov málim etti.

«Memlekettik áleýmettik tapsyrys búgingi ýaqyt talabyna jaýap bermeıdi. Qazirgi tańda saıasat pen qarjylyq múmkindikter ózgergen, onyń ústine jańa býyn aýysty. Jaqyn arada bul salany ózgertý qajet», - dep atap ótti N.Erimbetov.

Onyń sózine qaraǵanda, keıbir sheneýnikter memlekettik tapsyrysty aqsha tabýdyń quralyna aınaldyrǵan. N. Erimbetovtiń pikirinshe, bul salany túbegeıli ózgertýdiń taǵy bir sebebi osynda jatyr.

«Maǵan memlekettik áleýmettik tapsyrys úderisin keıbir sheneýnikter jabyq jaǵdaıda retteıtini unamaıdy. Bunyń barlyǵy ÚEU-nyń bedeline nuqsan keltiredi. Ásirese aımaqtarda «bir kúndik» úkimettik emes uıymdar kóp boldy. Osy oraıda biz óz ıdeıalarymyzdy jyljytý maqsatynda memlekettik organdardyń birqatar fýnktsııalaryn úkimettik emes uıymdardyń qyzmettik aıasyna aýystyrýdy qarastyrýymyz qajet. Meniń oıymsha, bul - zaman talaby», - deıdi ol.

Sharany QR Mádenıet jáne aqparat mınıstrliginiń, AQSh-tyń halyqaralyq damý agenttiginiń (USAID) qoldaýymen «Qazaqstannyń azamattyq alıansy» ZTB jáne «Amansaýlyq» qoǵamdyq qory uıymdastyrdy. Konferentsııa jumysyna ÚEU-nyń 70-ke tarta ókili jáne memlekettik organdar qatysty.

Aıta keteıik, statıstıka boıynsha, Qazaqstanda sońǵy 5 jyl ishinde ÚEU-nyń sany 35 paıyzǵa artyp, 27 myńnan asyp jyǵylǵan. Onda shamamen 1,5 mln. adam qyzmet etedi. Jyl saıyn memlekettik tapsyrysqa qajetti qarajat kólemi de ósip keledi. Máselen, 2013 jyly bıýdjetten rekordty, shamamen 5 mlrd. teńge qarjy bólingen.