Memlekettik organdardyń ashyq otyrystary onlaın-translıatsııalanady - M. Áshimbaev
Bul týraly búgin Májilistiń jalpy otyrysynda depýtat Máýlen Áshimbaev málim etti. Eske salaıyq, jalpy otyrysta «Aqparatqa qol jetkizý týraly» zań jobasy talqylanǵan bolatyn.
Zań jobasy negizinen árkimniń zańmen tyıym salynbaǵan kez kelgen tásilmen aqparatty erkin alý jáne taratý jónindegi konstıtýtsııalyq quqyǵyn iske asyrý bolyp tabylady.
Depýtat Máýlen Áshimbaevtyń aıtýynsha, qujat Elbasynyń bes ınstıtýtsıonaldyq reformasy aıasyndaǵy «ashyq memleketti qalyptastyrý» atty besinshi baǵytyn qalyptastyrýǵa baǵyttalady. Bul rette «100 naqty qadam» Ult josparynyń 95-96-y qadamdaryn iske asyrý kózdeledi.
«Aqparatqa qol jetkizý tásilderin keńeıtý máseleleri de kózdelip otyr. Máselen, QR Parlamenti palatalarynyń birlesken otyrysyn qosa alǵanda, Parlamenttiń jalpy otyrystaryn, oblystardyń, respýblıkalyq mańyzy bar qalalarynyń, astananyń jergilikti ókildi organdarynyń ashyq otyrystaryn onlaın-translıatsııalaý, sonymen qatar, jyl qorytyndylary boıynsha ótkiziletin memlekettik organdardyń alqalaryn ınternet-resýrstar arqyly aqparatqa qol jetkizý usynylady. Bul shyndyǵynda jańashyl norma. Biz Parlamentte ashyq otyrystardy onlaın rejımde ótkizip júrmiz. Endi osy normany keńeıtý sharalary da qamtylady», - dedi Máýlen Áshimbaev.
Budan bólek, Memleket basshysynyń tapsyrmasyna sáıkes, jergilikti atqarýshy organdar basshylarynyń, ákimder men ulttyq ýnıversıtet rektorlarynyń eseptik kezdesýlerin ótkizý mindetteledi. «Buǵan deıin tek ákimder ǵana jurtshylyq aldynda esepti kezdesýler ótkizip keldi. Endigi kúni zań jobasyna sáıkes, mınıstrler, memlekettik organ basshylary men ulttyq ýnıversıtet rektorlary da esep berý kezdesýlerin ótkizetin bolady», - dedi depýtat M. Áshimbaev.
