Memlekettik organdar jańa júıege qashan kóshedi – Qaırat Kelimbetov
Bul týraly QR Strategııalyq josparlaý jáne reformalaý agenttiginiń tóraǵasy Qaırat Kelimbetov aıtyp berdi, dep habarlaıdy QazAqparat tilshisi.
9 naýryzda Memleket Basshysy Qasym-Jomart Toqaevtyń Jarlyǵymen elimizdiń 2025 jylǵa deıingi damýynyń ulttyq jospary bekitilgen edi.
«QR Memlekettik Strategııalyq josparlaý júıesiniń negizin qalaýshy tarmaǵy – Tuńǵysh Prezıdent – Elbasynyń «Qazaqstan – 2050» Strategııasynda belgilengen mindetterdi iske asyrý bolyp otyr. Strategııany damytýda orta merzimdi strategııalar qabyldanady. Olardyń biri – Ulttyq damý jospary bolady. Ulttyq damý josparynyń naqty basymdyqtary bolýy úshin Prezıdent Jarlyǵy qabyldandy, onda jalpyulttyq basymdyqtar kórsetildi. Jalpyulttyq basymdyqtar – ekonomıkany, bizdiń áleýmettik salamyzdy damytýdyń negizgi baǵyttarynyń arnaıy tizbesi, olar aldaǵy bes jylǵa qandaı maqsattar qoıatynymyzdy, oǵan qalaı qol jetkizetinimizdi jáne qandaı da bir baǵytqa jeke jaýapty bolatynymyzdy anyq túsiný úshin qajet», - dedi Qaırat Kelimbetov Ortalyq kommýnıkatsııalar qyzmetinde ótken baspasóz máslıhatynda.
Sonymen birge, spıker jospar aıasynda memlekettik organdardyń jańa júıe boıynsha qashan jumys isteıtinin aıtty.
«Ózgerister aıasynda kóptegen qujattar qysqartyldy jáne tutastaı alǵanda, júıeniń ózi shaǵyn ári qonymdy boldy. Biz qazir memlekettik organdar jańa júıege kóshetin joldyń basynda turmyz. Kóshý jyl sońyna deıin aıaqtalady. Al negizgi bóligi – ulttyq jobalarǵa, jańa bıýdjettik baǵdarlamalarǵa kóshý 1 qyrkúıekke deıin aıaqtalady», - dedi Q.Kelimbetov.
Aıta keteıik, elimizdiń 2025 jylǵa deıingi damýynyń ulttyq josparynda elimizdiń jańa ekonomıkalyq baǵytynyń negizgi mindetteri men parametrleri aıqyndalǵan.
