Memlekettik organdar vedomstvoǵa táýeldi uıymdardy básekelestik ortaǵa berýge asyqpaı otyr - B. Qýandyqov
ASTANA. 1 shilde. QazAqparat - Memlekettik organdar vedomstvoǵa táýeldi uıymdardy básekelestik ortaǵa berýge asyqpaı otyr.
Búgin Úkimet otyrysynda QR Básekelestikti qorǵaý agenttiginiń tóraǵasy Bolatbek Qýandyqov osylaı málim etti. Eske salsaq, Úkimet otyrysynda taýar naryqtarynda básekelestikti qorǵaý júıesin jetildirý máselesi talqylanǵan bolatyn.
«Qoldanystaǵy «Básekelestik týraly» zańǵa sáıkes, odan arǵy qyzmetinen bas tartylǵan memlekettiń qatysýyndaǵy kásiporyn uıymdary jekeshelenýi nemese memlekettik mekemege qaıta uıymdastyrylýy qajet bolatyn. Alaıda, buǵan qaramastan memlekettik organdar vedomstvoǵa táýeldi uıymdardy básekelestik ortaǵa ótkizýge asyqpaı otyr. Qazirgi tańda bas tartylǵan 440 kásiporynnyń 226-sy áli kúnge básekelestik ortaǵa berilmeı keledi», - deıdi B. Qýandyqov.
Agenttik basshysynyń aıtýyna qaraǵanda, bundaı olqylyq negizinen memlekettik satyp alý týraly zań normasynyń kemshiliginen oryn alyp otyr. «Onda 100 paıyz memlekettik kásiporyndardyń satyp alýlardy bir kózden júzege asyrý bar», - deıdi agenttik tóraǵasy. Onyń aıtýynsha, monopolııaǵa qarsy organnyń bas tartýyna qaramastan memlekettik kásiporyndar qyzmetterin jalǵastyryp, memlekettik tapsyrys alyp keledi. «Problema qatań sharany talap etedi. Sondyqtan da, memlekettik tapsyrystan bas tartylǵan kásiporynnyń naryqta qala berýine jol beretin Úkimettiń qaýlysyn joıý qajet dep sanaımyz», - dedi B. Qýandyqov.
