Memlekettik organdar múliktik zalaldyń ornyn toltyrýǵa tıisti kóńil bólmeı otyr - QR Bas prokýratýrasy
ASTANA. 19 qarasha. QazAqparat - Búgin Bas prokýror Ashat Daýylbaevtyń tóraǵalyq etýimen Bas prokýratýranyń alqa májilisi bolyp ótti.
Onda qylmystyq protsestegi qadaǵalaý jaı-kúıi jáne azamattyq talap aryzdardy qaraý tájirıbesi, sondaı-aq uıymdasqan qylmys, sonyń ishinde esirtki bıznesi salasyndaǵy qylmystylyqqa qarsy kúres tıimdiligin arttyrý máseleleri qaraldy, dep habarlady QR Bas prokýratýrasynyń baspasóz qyzmeti.
Alqa jumysyna Іshki ister mınıstrligi, Ulttyq qaýipsizdik komıteti, Ekonomıkalyq qylmysqa jáne sybaılas jemqorlyqqa qarsy kúres agenttigi, Qarjy mınıstrliginiń Kedendik baqylaý komıtetiniń basshylary men qyzmetkerleri, beınekonferentsııalyq baılanys arqyly oblys prokýrorlary men óńirlik quqyq qorǵaý organdarynyń basshylary qatysty.
Bas prokýratýra júrgizgen taldaý kórsetkendeı, memlekettik organdar óz áleýetterin tolyqqandy paıdalana almaı otyr. Jasalǵan qylmystary úshin jazanyń bolatyny týraly máseleni qarastyra otyryp, japa shegýshilerdiń buzylǵan quqyqtary men múddelerin qalpyna keltirý jáne múliktik zalaldyń ornyn toltyrý máselelerine qajetti deńgeıde nazar aýdarylmaıdy. Al qylmystan japa shegýshilerdiń negizgi bóligine dál osy múliktik zalaldyń ornyn toltyrý ómirlik mańyzdy másele bolyp tabylady.
Qalyptasqan jaǵdaı kináli tulǵalardyń múlikterin anyqtaý boıynsha qabyldanyp otyrǵan sharalardyń jetkiliksizdigi saldarynan bolyp otyr, bul óz kezeginde múlikti óndirip alý nemese tárkileýden jaltarýǵa jaǵdaı týǵyzady. Mysalǵa, 2011 jyly 284 mlrd. teńgeni quraıtyn qylmystar keltirgen shyǵynnyń jalpy somasynan 33 mlrd. óndirilgen. Aǵymdaǵy jyly 137 mlrd. teńgeden 109 mlrd. teńge óndirýsiz qalyp otyr.
Múliktik zalaldyń ornyn toltyrý boıynsha jumystardyń nátıjeliligin arttyrý maqsatynda ýákiletti organdardyń aldyna shyǵynnyń ornyn toltyrý jáne zardap shekkenderdiń quqyqtaryn qalpyna keltirýdiń tıimdi tetigin qalyptastyrýǵa baǵyttalǵan usynystar daıyndaý tapsyrmasy qoıyldy.
Azamattyq sot óndirisi tártibinde shyǵyn somasyn óndirý boıynsha jumystardyń belsendiligin arttyrý, sondaı-aq memleketke shyǵyn keltirýmen baılanysty sotqa joldanǵan qylmystyq isterdiń barlyǵy boıynsha azamattyq talap aryzdarǵa bastama kóterý qajettiligi atap kórsetildi.
Óńirlik prokýrorlarǵa aıyptalýshy tulǵalardyń múlikterin anyqtaý jáne jasalǵan qylmystardan zardap shekkenderge keltirilgen shyǵyndardy óteý boıynsha aldyn-ala tergeý jáne anyqtaý zańdylyǵyna qadaǵalaýdy kúsheıtý tapsyryldy.
Jınalysta sondaı-aq uıymdasqan qylmysqa, sonyń ishinde esirtki bıznesi salasyndaǵy qylmystylyqqa jáne quqyq buzýshylyqqa tosqaýyl qoıý boıynsha quqyq qorǵaý organdarynyń ózara is-qımylyn arttyrý máseleleri qaraldy. Esirtki qylmystarymen kúrestiń tıimdiligin odan ári arttyrý maqsatynda osy saladaǵy qylmystar men quqyq buzýshylyqtardyń jolyn kesýge baǵyttalǵan sharalar kesheni usynyldy. Sondaı-aq esirtki zattarynyń kelý jáne tasymaldaý arnalaryn anyqtaý, kontrabandamen aınalysatyn transulttyq uıymdasqan qylmystyq top qyzmetteriniń jolyn kesý boıynsha shekaralas memleketterdiń ýákiletti organdarymen ózara is-qımyldyń nysandary men ádisterin jetildirý qajettiligi atap ótildi.
