Memlekettik organdar benzınniń sapasyn baqylaı almaı otyr - depýtat Şegelskıı
ASTANA. QazAqparat - Búgin Parlament Májilisindegi otandyq munaı-gaz salasyn damytýǵa arnalǵan Úkimet saǵatynda depýtat Gleb Şegelskıı benzınniń sapasyn synǵa aldy, dep xabarlaıdy QazAqparat tilshisi.
«Bul másele kópten beri bizdiń saılaýshylarymyzdy mazalap júr. Sebebi benzın satýshylary joǵary oktandy benzınge tómen oktandy benzındi jıi aralastyryp jatady. Qazirgi kezde benzınniń sapasyn tekserý mindeti Ulttyq ekonomıka mınıstrligi Tutynýshylar quqyqtaryn qorǵaý komıtetiniń quziretine kiredi. Buryn ol jumysqa Investıtsııalar jáne damý mınıstrligi Texnıkalyq retteý komıteti jaýap beretin. Ókinishke qaraı, burynǵy komıtet te, qazirgi komıtet te benzınniń sapasyn qatań baqylaýǵa ala almaı keledi. Sol sebepti osy máseleni Úkimetke tıisti usynystar jasap, janar-jaǵar maı stansalarynda satylatyn munaı ónimderine tıisti baqylaý júrgizý qajet», - dep atap kórsetti depýtat Şegelskıı.
Aıta keteıik, búgingi Úkimet saǵatynda QR Energetıka mınıstri Qanat Bozymbaev Qashaǵandaǵy munaı óndirý kóleminiń kommertsııalyq deńgeıge jetkenin málimdedi.
