Memlekettik organdar arasyndaǵy aýysym tártibimen taǵaıyndaýlar Elbasy belgilegen jaǵdaılarda ǵana júzege asady - zań jobasy
ASTANA. 6 qarasha. QazAqparat - Búgin Parlament Májilisi Ekonomıkalyq reforma jáne óńirlik damý komıtetinde «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasy talqylandy.
Eske sala ketsek, zań jobasy Memleket basshysynyń 2011 jyly shilde aıynda bekitken memlekettik qyzmettiń jańa modeli Tujyrymdamasyn júzege asyrý jáne naqty tapsyrmalaryn oryndaý maqsatynda ázirlengen. Sonymen qatar, atalǵan zańnyń qabyldanýy Elbasy N.Nazarbaevtyń «Qazaqstannyń áleýmettik jańǵyrýy Jalpyǵa Ortaq Eńbek Qoǵamyna 20 qadam» atty baǵdarlamalyq maqalasynda kórsetilgen mindetterge sáıkes keledi. Sebebi, merıtorkatııa qaǵıdattaryn kúsheıtý áleýmettik túrlendirý quraldarynyń biri bolyp tabylady. Zań jobasynyń negizgi basymdyqtaryna keletin bolsaq, onda kadrlardy irikteý men joǵarylatý kezinde merıtokratııa qaǵıdatyn kúsheıtý, «A» basqarýshylyq korpýsyn qurý, personaldy basqarý ınstıtýttary men mehanızmderin jetildirý, kadr qyzmetiniń rólin arttyrý, sondaı-aq tártiptik jáne etıkalyq baqylaýdy kúsheıtý normalary engizilip otyr.
Bul maqsatta zań jobasymen konkýrstyq irikteýge baılanyssyz, irikteýdiń derbes kezeńi retinde testileýden ótkizý qarastyrylǵan. Bul memlekettik organdardyń konkýrstyq rásimderin ótkizý ýaqytyn neǵurlym qysqartýǵa (50-60 kúnnen 15-20 kúnge) múmkindik beredi.
Zań jobasymen «komandalyq kóshýlerdi» neǵurlym azaıtý jáne memlekettik organdardyń basshylary aýysqan jaǵdaıda ákimshilik memlekettik qyzmetkerlerdiń qorǵalýyn kúsheıtý maqsatynda memlekettik organdar arasyndaǵy aýysym tártibimen taǵaıyndaýlar Elbasy belgilegen jaǵdaılarda ǵana júzege asyrylatyndyǵy qarastyrylǵan. Osy maqsatta konkýrstyq komıssııalar tek osy memlekettik organ paıdalanatyn kadr rezervin jasaqtaıtyny belgilengen.
Budan bólek, alǵashqy ret zań jobasynda memlekettik qyzmetshilerdiń Ar-namys Kodeksin jáne jemqorlyqqa qarsy normalardy qosatyn qyzmettik etıkasy jóninde bólek taraý engizilgen.
