Memlekettik organdar «Aqparattyq qoljetimdilik týraly» zańdy tolyq oryndaýlary kerek - M. Áshimbaev
ASTANA. QazAqparat - Memlekettik organdar «Aqparattyq qoljetimdilik týraly» zańdy tolyq oryndaýlary kerek. Búgin Jańǵyrtý jónindegi ulttyq komıssııanyń «Ashyq Úkimetti» engizý jónindegi Kishi jumys tobynyń otyrysynda Májilis depýtaty, jumys tobynyń jetekshisi Máýlen Áshimbaev osylaı málim etti.
«Ult josparynyń «Ashyq Úkimetti» qalyptastyrý baǵyty boıynsha Kishi jumys tobynyń aldynda birqatar mańyzdy mindetter tur. Bul rette birinshi kezekte, «Aqparatqa qol jetimdilik týraly» zańnyń júzege asýy men oryndalý barysyna monıtorıngti atap ótkim keledi. Bul zańdy qabyldaýǵa bárimiz atsalystyq. Endi memlekettik organdar ony tolyq oryndaýǵa basa nazar aýdarýlary kerek. Biz ózimizdiń jumys tobymyz aıasynda «Aqparatqa qol jetimdilik týraly» zańnyń oryndalýyna qatysty úderisterdi baqylaıtyn bolamyz», - dedi M. Áshimbaev.
Onyń aıtýynsha, aldaǵy ýaqytta «Aqparatqa qoljetimdilik týraly» zańnyń oryndalý barysynda jumys istemeıtin normalardy anyqtaýǵa, quqyqtyq olqylyqtarǵa, kemshilikterge, zańdaǵy normalyq jetispeýshilikterge mán beriledi. Bul baǵytta tıisti saraptamalar da jasalatyn bolady.
«Osyndaı olqylyqtardyń oryn alýyna oraı, biz aldaǵy ýaqytta zańnamaǵa ózgerister engizý múmkindigin de qarastyramyz. Árıne, ony ýaqyt kórsetedi. Degenmen, bul úshin biz qaı normalarda kemshilikter ketkenin naqty anyqtap, bilýge tıispiz. Úshinshiden, memlekettik organdar qyzmetiniń ashyqtyǵyn qamtamasyz etý boıynsha usynystar ázirleıtin bolamyz. Osyǵan baılanysty, biz Ult Josparynyń 94, 95, 96 qadamdarynyń júzege asyrylýyn keshendi túrde qarastyratyn bolamyz», - dedi Máýlen Áshimbaev.
