Memlekettik organda kelisimshartpen jumys isteıtin qyzmetshiler nemen aınalysady

ASTANA. QazAqparat – Elimizde memlekettik organ kelisimshart boıynsha tartatyn kelisimsharttyq qyzmetshiler ınstıtýty zańnamalyq turǵyda bekitiledi. Bul týraly Senattyń jalpy otyrysynda QR Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi.

Atap aıtqanda, búgin palata otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» Zań qabyldandy.

Kelisimsharttyq qyzmetshiler ınstıtýty týraly norma osy zańda qamtylyp otyr.

QR Memlekettik qyzmet isteri agenttiginiń tóraǵasy Darhan Jazyqbaevtyń aıtýynsha, ulttyq jáne ózge de jobalardy iske asyrý úshin memlekettik organ kelisimshart boıynsha tartatyn kelisimsharttyq qyzmetshiler ınstıtýtyn zańnamalyq bekitý eskerilgen.

Memlekettik basqarýdy damytýdyń 2030 jylǵa deıingi tujyrymdamasynda memlekettik apparat shtatyn ońtaılandyrǵannan keıin, kelisimsharttyq qyzmetshiler ınstıtýtyn engizý mindeti qoıylǵan.

«Olar memlekettik qyzmetshi sanatyna jatpaıdy. Bul salalyq jobalardy iske asyrý kezeńine arnaýly bilimi bar kásibı mamandardy tartýǵa múmkindik beredi. Kelisimshart merzimi bir jyldan aspaıdy. Kelisimsharttyq qyzmetshilerge qatysty naqty ereje men tártip tıisti Úkimet qaýlysynda belgilenedi», - dedi agenttik basshysy.

Aıta keteıik, buǵan deıin buqaralyq aqparat quraldaryna bergen suhbatynda Darhan Jazyqbaev atalǵan ınstıtýtqa qatysty túsinik bergen bolatyn.

Memlekettik organdardaǵy kelisimsharttyq qyzmetshiler memlekettik qyzmetshiler bolyp sanalmaıdy. Alaıda kelisimshartqa sáıkes olarǵa naqty mindetterdi sheshýde belgili bir quzyretter beriledi. Kelisim­sharttyq qyzmetshilerdiń qyzmeti men mindetteri bir jyldyq merzimge jasalatyn eńbek shartynda aıqyndalady.

Kelisimsharttyq qyzmetshilerdi tartý birqatar mindetti sheshýge yqpal etedi dep kútiledi.

Atap aıtsaq, memlekettik bastamalar men salalyq jobalardy tabysty iske asyrýdy; naqty salada, ekonomıka segmentinde, áleýmettik salada biregeı, tabysty, ózindik tájirıbeni taratý jáne engizýdi; jańa tehnologııalar transfertin qamtamasyz etýdi; ınnovatsııalyq oılaýdy damytýdy; memlekettik bastamalar men salalyq jobalardy iske asyrý kezinde praktıkalyq ózara is-qımyl arqyly memlekettik qyzmetshilerdiń biliktiligin arttyrýdy; memlekettik apparatty basqarýdyń ıkemdi modelin damytýdy retteı alady.