Memlekettik organda basqarý laýazymdary qysqarady
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova aıtty.
«Memleket basshysynyń tapsyrmasyna sáıkes, 2019 jyly 19 aqpanda memlekettik jáne jergilikti atqarý organdarynyń shtattyq kólemin ońtaılandyrý boıynsha keshendi jospar qabyldandy. Bul jospar 2 jylǵa eseptelgen. Munda kútiletin eń basty nátıje - halyqtyń muń-muqtajyna baǵyttalǵan yqsham memlekettik apparat qurý», - dedi Aıgúl Shaıymova Sybaılas jemqorlyqqa qarsy Ulttyq bıýroda ótken brıfıngte.
Onyń aıtýynsha, aldaǵy jarty jylda ortalyq jergilikti atqarý organdarynda jáne vedomstvalyq baǵynyshty uıymdarda shtattyq kólemdi qysqartý jumystary júrgiziledi. Birinshi kezekte basqarý bólimderi ońtaılandyrylady.
«Búginde memlekettik qyzmettegi jyl saıynǵy monıtorıng derekteri boıynsha 1 jetekshige 2 atqarýshydan keledi. Basqarý bólimderin qysqartý jqmystaryn ózimizden bastadyq, azamattyq jáne quqyq qorǵaý bólimderinde qysqartý jumystary júrdi. Máselen, Ulttyq bıýroda 1 jetekshige 7 atqarýshydan keledi», - dedi ol.
Sonymen birge, sapa memlekettik qyzmetshi jumysynyń basty kórsetkishi bolady. Bul aspektide memlekettik organdar qyzmetindegi qaǵazbastylyqty azaıtý mindeti qoıylǵan.
«Ekonomıkalyq zertteýler qyzmetinde 40% kadrlyq qysqartý josparlanǵan. Dál osyndaı jumys Іshki ister mınıstrliginde, Ádilet, Energetıka mınıstrlikterinde júrip jatyr. Óńirderde de tabysty tájirıbeler baıqalady. Máselen, Astana qalasynyń ákimdiginde qurylymdyq bólimsheler men uqsas qyzmetter biriktirildi. Alǵashqy kezeńde 27 qurylymdyq bólimshe 17 bólimshege biriktirildi. Aldaǵy ýaqytta da biriktirý jumystary jalǵasady jáne elorda ákimdiginde 13 qurylym qalady», - dedi A. Shaıymova.
