Memlekettik organ ókilderi Qoǵamdyq keńestegi jumysqa qulyqsyz - Aıgúl Soloveva
«Qoǵamdyq keńes degen qolyna bir sómke ustap alyp, teksere berý degen sóz emes. Bul máseleni taldaý, oǵan saraptama júrgizý, zertteý. Sondyqtan, halyqaralyq tájirıbede memlekettik organdar qoǵamdyq keńes qoıǵan máselege negizdi ári resmı túrde jaýap beredi. Bul naǵyz - baqylaý jáne yqpal etý bolyp tabylady. Sózsiz, suraqtar bar. Sonymen birge, qoǵamdyq keńester ózderiniń otyrystaryn ótkizgen kezde sol keńestiń quramynyń memlekettik organdardardan turatyn úshten birin quraıtyn músheleri kóp jaǵdaıda kelmeı qoıady. Ekinshiden, olar qoǵamdyq keńestiń otyrysyna kelgenimen, jaı ǵana beıqam otyrady. Úshinshiden, olar ózdiginen jumysqa qulyqsyz. Tórtinshiden, qoǵamdyq monıtorıng júrgizgen kezde nemese saraptama júrgizer kezde olar tarapynan quzyryn paıdalana otyryp, iske áser etýde belsendi emes», - deıdi Aıgúl Soloveva.
Onyń aıtýynsha, memlekettik organdardyń adamdary qoǵamdyq keńestiń jumysyna marǵaý aralasady. Sonymen birge, olardyń keıbiri jumys babymen ósip ketedi de, qoǵamdyq keńesten de alystap kete barady.
«Sondyqtan, qoǵamdyq keńestiń músheleri quramynan memlekettik organdardardyń adamdarynyń sanyn azaıtý týraly másele kóterdik. Osyndaı shaǵyn otyrysta máseleniń bárin tizý múmkin emes. Aımaqtardaǵy qoǵamdyq keńestiń músheleri memlekettik organdardyń qyzmetkerleri qoǵamdyq keńesti basqarǵysy keletinin aıtady. Mundaı máseleleler de bar», - deıdi ol.
Aıgúl Soloveva sonymen qatar, naqty mysaldardy keltirdi.
«Jaqynda ǵana «Atamekende» biz suraqty talqyladyq. Sonda túsingenimiz, qoǵamdyq keńes balabaqshalarǵa baqylaý júrgizgen. Odan keıin qoǵamdyq keńestiń sheshimin memlekettik organ paıdalana otyryp, jeke balabaqshalardy qarjylandyrýdy toqtatyp tastaǵan. Al bul jerde múddeler qaıshylyǵy týyndap otyr. Bul qoǵamdyq keńestiń jumysyn paıdalaný bolyp tabylady», - dep túıdi Aıgúl Soloveva.
