Memlekettik nómirdi kólegeıleıtin qurylǵysy bar «Porsche Cayenne» mashınasy ustaldy

Bul týraly Astana qalalyq ІІD memlekettik til jáne aqparat bóliminiń bastyǵy Nurdildá Oraz málim etti.

Onyń aıtýynsha, jol polıtsııasynyń ınspektory Turan kóshesinde «Porsche Cayenne» avtokóligin toqtatqan. Kóliktiń memlekettik nómiri tikeleı kún sáýlesi túskende shaǵylysyp, kózge kórinbeıtindeı bolyp jasalǵan. Tekserý barysynda kóliktiń aldyńǵy memlekettik nómirin qajet kezinde kólegeıleıtin arnaıy qurylǵysynyń da bar ekendigi anyqtalǵan. Kerek kezinde júrgizýshi pýltti bassa perdesi jabylyp, memlekettik nómirdi tolyqtaı kórsetpeı tastaıdy eken.

«Jol polıtsııasynyń qyzmetkerleri málimetter bazasy arqyly tekserip, 1962 jyly týylǵan qaladaǵy bir jaýapkershiligi shekteýli seriktestigi dırektorynyń 4 ret jyldamdyqty asyryp, júrý erejesin buzǵandyǵyn anyqtady. Qazirde kólik júrgizýshisine barlyq fakt boıynsha QR Ákimshilik quqyq buzýshylyq kodeksiniń 441 babymen ákimshilik hattama toltyryldy. Tergeý amaldary júrgizilip jatyr», dedi ol.