Memlekettik muraǵatta Qazaq handyǵynyń qurylǵanyna 550 jyl tolýyna oraı kórme ótti
ASTANA. QazAqparat - Búgin Astana qalasyndaǵy Memlekettik muraǵatta «Máńgilik el» ıdeıasy arqyly qazaq memlekettigine» atty dóńgelek ústel ótti. Qazaq handyǵynyń qurylǵanyna 550 jyl tolýyna oraı ótkizilgen shara aıasynda arnaıy kórme de uıymdastyrylyp otyr.
Eske sala keteıik, Qazaq handyǵynyń ornaýy men qazaq memlekettiliginiń qurylý alǵysharttary mańyzdylyǵy boıynsha ult tarıhynyń eń negizgi kezeńderiniń biri bolyp sanalady. Al 1465 jyly Kereı men Jánibek sultandar Qazaq handyǵynyń negizin qalady. Osylaısha, XV ǵasyrdaǵy bul tarıhı oqıǵa keıingi júzjyldyqtarda qazaq halqynyń birigip, nyǵaıýyna, ulttyń qonystaný aýmaǵynyń tutastyǵyna, sanǵasyrlyq mádenıetiniń gúldenýine jol ashty. Dóńgelek ústel barysynda táýelsiz Qazaqstan men Qazaq memlekettiliginiń ornaýy men damýy, jáne birtutas erkin ult ıdeıasy máseleleri talqylandy.
«Biz bıyl ulttyq memleketimizdiń 550 jyldyǵyn atap ótemiz. Shyndyǵynda, keıbireýler tarıhty 550 jylmen shekteý uly qazaq dalasyndaǵy muralardy onyń aldyndaǵy tarıhty elemeýmen teń dep júr. Bul durys emes. Biz bir nárseni uǵyp alaıyq: másele osydan 550 jyl buryn qurylǵan ulttyq memelket jaıynda bolyp otyr. Al bizdiń keıbir kórshilerimiz ózderiniń ulttyq memelketterin tipti bertinde ǵaan qurdy emes pe? Sondyqtan da, Qazaq handyǵynyń 550 jyldyǵy ult mereıi úshin úlken mártebe» - dedi Eýrazııa ulttyq ýnıversıtetiniń professory Altaıy Orazbaeva.
Shara aıasynda Qazaq handyǵynyń qurylǵanyna 550 jyl tolýyna arnalǵan kórme oraılastyryldy. Kórmege áıgili qazaq handarynyń atqarǵan jumystary jaıly jaqyn shetelderdiń muraǵattarynan tabylǵan biregeı qujattar usynylǵan. Atap aıtsaq, Ábilqaıyr hannyń Reseı patshaıymy Anna Ioanovnanyń jáne Abylaı hannyń Uly Ekaterına patshaıymmen alysqan hattary qoıyldy.
