«Memlekettik múlik týraly» zań jobasy Májiliske qaıtaryldy

Sondaı-aq depýtattar atalmysh qujatty tolyqtyratyn «Qazaqstan Respýblıkasynyń keıbir zańnamalyq aktilerine memlekettik múlik máseleleri boıynsha ózgerister men tolyqtyrýlar engizý týraly» zań jobasyn da qatarynan eki oqylymda qarap, Májiliske qaıtardy.

Otyrysta atalmysh zań jobalaryna baılanysty baıandamany Ekonomıkalyq damý jáne saýda mınıstri Janar Aıtjanova jasady. Onyń sózine qaraǵanda, «Memlekettik múlik týraly» zań jobasyn ázirleýdiń maqsaty - memlekettik múliktik quqyqtardy alǵan sátten bastap, olardy toqtatqanǵa deıingi memlekettik múlikti basqarý júıesin qalyptastyrý bolyp tabylady. «Memlekettik múlik respýblıkalyq jáne kommýnaldyq bolyp ekige bólinedi. Zań jobasy birinshiden memlekettik múlikke quqyq alýdyń barlyq negizin júıelendiredi. Sonymen qatar ol buryn rettelmegen nemese zańnamada tek qana silteme erejeleri ǵana bar jańa ınstıtýttardy engizý máselesin qarastyrady. Múlikke ıe bolý negizderi bıýdjetke túsetin túsimder, respýblıkalyq zańdy tulǵalardyń múlikti satyp alýy, tárkileý, múlikti azamattyq quqyqtaǵy sharttar negizinde satyp alý sııaqty sharalardyń negizin qalyptastyrady. Zańnamada alǵash ret Konstıtýtsııanyń 26-shy baby 3-shi tarmaǵyn is júzinde qoldaný maqsatynda memlekettik qajettilik úshin múlikti alyp qoıý kezinde memlekettik múliktiń quqyqtaryn alý rásemderi naqtylanyp, tolyq kólemde rettelgen», - dedi mınıstr.

Sondaı-aq onyń sózine qaraǵanda, «Qazaqstan Respýblıkasynyń keıbir zańnamalyq aktilerine memlekettik múlik máseleleri boıynsha ózgerister men tolyqtyrýlar engizý týraly» zań jobasy memlekettiń memlekettik múlikke degen quqyqtaryn qamtamasyz etý, memlekettik múlikti basqarýdy júzege asyratyn memlekettik organdar quziretiniń ara-jigin ajyratý, sondaı-aq memlekettik múlikti ulttyq holdıngter men ulttyq kompanııalar arqyly korporatıvti basqarýdyń quqyqtyq negizderin belgileýdi qarastyrady.