Memlekettik monopolııanyń birqatar túrlerin qysqartyp, ony básekelestik ortaǵa berý usynylady
ASTANA. 6 maýsym. QazAqparat /Qanat Mámetqazyuly/ - Búgin QR Parlamenti Májilisiniń Ekonomıkalyq reforma jáne óńirlik damý komıtetiniń uıymdastyrýymen «Qazaqstan Respýblıkasynyń keıbir zańnamalyq aktilerine memlekettik monopolııa máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótti.
Zań jobasy jaıynda Básekelestikti qorǵaý jónindegi agenttiginiń tóraǵasy Májıt Esenbaevtyń aıtýynsha, zań jobasynda memlekettik monopolııa túrlerin qysqartý usynylady, bul memlekettik kásiporyndar sanyn qysqartýǵa ákep soǵady. «Zań jobasymen memlekettik monopolııanyń birqatar túrlerin qysqartý qarastyrylyp otyr. Bul Elbasynyń memlekettiń ekonomıkaǵa kıligýin azaıtý týraly tapsyrmasyn oryndaýǵa múmkindik beredi», - deıdi M. Esenbaev. Onyń aıtýynsha, «Básekelestik týraly» QR zańyna sáıkestendirý talap etiletin 24 zańnamalyq aktileriniń 10-ynda memlekettik monopolııa týraly normalar qamtylǵan. Alaıda, buny júzege asyrýdyń naqty tetikteri anyq kórsetilmegen bolyp otyr. Al 14 zańnamalyq aktide qyzmet túrlerin tikeleı memlekettik monopolııaǵa berý qalys qalǵanymen, memlekettk quqyq naqty bekitilgen.
Budan bólek, zań jobasynda tótenshe jaǵdaılar salasyndaǵy, topologııany quqyqtyq qorǵaý salasyndaǵy, ósimdikterdi qorǵaý salasyndaǵy qyzmet túrlerin memlekettik fýnktsııalarǵa jatqyzý kózdelgen. Qujatty qabyldaý memlekettik monopolııa sýbektileriniń qyzmetin birkelki etýge jáne ashyqtyǵyna, memlekettik monopolııany kózdeıtin zańnama normalaryn bir júıege keltirýge, baǵalardy tártipke keltirý, shaǵyn orta bızneske júktemeni azaıtýǵa, ekonomıkany monopolııalandyrý úderisin tómendetýge múmkindik beredi.
Zań jobasy boıynsha jumys tobyna depýtat Valerıı Doskalov jetekshilik etedi.
