Memlekettik monopolııa máseleleri jónindegi joba maquldandy - Májilis
ASTANA. 2 mamyr. QazAqparat - Búgin QR Parlamenti Májilisiniń Tóraǵasy Nurlan Nyǵmatýlınniń jetekshiligimen ótken palatanyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik monopolııa máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasy ekonomıkaǵa memlekettiń aralasýyn azaıtýdy qarastyrady. Bul rette ulttyq qaýipsizdikti, memlekettiń qorǵanys qabilettiligin, qoǵamdyq tártipti, halyq densaýlyǵyn qorǵaý maqsattarynda kásipkerlik qyzmetke memlekettiń qatysýy talap etiletin erekshe jaǵdaılarda ǵana memlekettik monopolııa engizý kózdeletin bolady. «Memlekettik monopolııaǵa jatqyzylǵan salalardy, memlekettik monopolııa dep jarııalanbaǵan erekshe quqyqtardy azaıtý jáne básekelestik naryqta qyzmet túrlerin kórsetý múmkindikterin zańnamalyq deńgeıde bekitý qarastyrylady. Áıtpese bulardy memlekettik mekemeler iske asyratyn fýnktsııalarǵa jatqyzý usynylady», - deıdi zań jobasy boıynsha baıandaǵan Májilis depýtaty Meıram Pishembaev.
Budan bólek, zań jobasynda baǵa belgileýdiń ashyq bolýyn qamtamasyz etý jáne memlekettik monopolııa sýbektisiniń joǵary tarıfterin belgileýge jol bermeý úshin baǵany QR Úkimetiniń bekitýi kózdelgen.
Qujatty ekinshi oqylymǵa ázirleý barysynda depýtattar birqatar ózgerister engizdi. Atap aıtqanda, aqparattandyrý salasyndaǵy operatordy, «elektrondyq úkimettiń» tólem shlıýzynyń operatoryn jáne memlekettik organdardyń biryńǵaı kólk ortasy operatoryn belgileýdiń qoldanystaǵy tártibin saqtaý qarastyryldy.
Májilis maquldaǵan zań jobasy Parlament Senatyna jiberiledi.
