Memlekettik mekemelerde balalardyń zaqymdanýy jıilep ketti – Dınara Zákıeva

ASTANA. QazAqparat – QR Bala quqyqtary jónindegi ýákil Dınara Zákıeva balalarǵa arnalǵan memlekettik mekemelerdiń jaǵdaıyn jaqsartý máselesin kóterdi, dep habarlaıdy QazAqparat.

«Mysaly, 577 ınternattyń jartysy jóndeýdi qajet etedi. Memlekettik 120 lager bar, olardyń da jaǵdaıy nashar. Sondaı-aq balalarǵa qyzmet kórsetetin uıymdarǵa arnalǵan biryńǵaı erejeler men talaptar engizý qajet. Óıtkeni keıingi kezderi mekemelerde balalardyń jaraqattanýy, quqyqtarynyń buzylýy jıilep ketti», - dep jazdy D. Zákıeva Facebook jelisinde.

Ýákildiń aıtýynsha, Prezıdent barlyq saladaǵy densaýlyq saqtaý, bilim berý, áleýmettik qorǵaýǵa qatysty máselelerdi sheshý úshin ata-analarmen, balalarmen, úkimettik emes uıymdarmen, óńirlerdegi bala quqyqtaryn qorǵaý jónindegi ýákildermen birge jumys isteýdi tapsyrǵan.

«Sol sebepti qoıylǵan mindetter men usynystardy iske asyrýdy talqylaý maqsatynda kúzde barlyq úkimettik emes uıymdardy jınaımyz dep josparlap otyrmyn», - dedi Dınara Zákıeva.

Aıta keteıik, keshe Memleket basshysy Bala quqyqtary jónindegi ýákil Dınara Zákıevany qabyldaǵan edi.

Bala quqyqtary jónindegi ýákil 152 aýdanda Otbasyn qoldaý ortalyǵyn ashýdy usynyp otyr.

Sondaı-aq, D. Zákıeva balalarǵa jasalǵan qylmystarǵa beriletin jazany kúsheıtýdi, bala qaýipsizdigi úshin jaýapkershilikti arttyrý keregin aıtty.