Memlekettik mekemelerde ashanalardy jaldaý bıznesmenderge qymbatqa túsýde

ASTANA. QazAqparat - Qazaqstan kásipkerleri memlekettik áleýmettik mekemelerdegi ashanalardy jalǵa alý tólemi toǵyz esege artqandyǵyna shaǵymdanyp otyr. Bul týraly QR Ulttyq kásipkerler palatasy janyndaǵy Kásipkerler quqyǵyn qorǵaý jónindegi keńestiń kezekti otyrysynda Keńes tóraǵasy Ǵanı Qasymov málim etti.

«Memlekettik múlikti jalǵa berýdiń jańa erejelerin bekitý turǵysynda kommýnaldyq menshiktegi nysandardy jalǵa alý tóleminiń quny 9 esege jýyq ósti. Jalǵa alynatyn kommýnaldyq menshik nysandarynyń basym bóligi oqý oryndary men áskerı bólimshelerdegi ashanalar. Osy oraıda bıznes tarapy jalǵa alý tólemi nelikten kúrt óskendigin túsinbeı otyr. Sonymen qatar olar jalǵa alý tólemin jabýǵa tabysty qalaı jasaıtyndyǵyn sheshe almaýda. Osy oraıda biz áleýmettik nysandar týraly aıtyp otyrmyz jáne osyny umytpaýymyz kerek», - deıdi Ǵ.Qasymov. Sondyqtan da jalǵa alýdan baǵany qalyptastyrý taǵamdardyń baǵasyna áser etpeýi tıis. «Bul durys emes. Sondyqtan kásipkerlerge mekteptegi jáne basqa da mekemelerdegi ashanalardy jaldaýdyń qymbat qunymen jumys isteý tıimsiz bolyp otyr», - dep toqtaldy ol. Palata baspasóz qyzmetiniń habarlaýynsha, QR Ulttyq ekonomıka mınıstrligi erejelerdiń jobasyn Ulttyq palataǵa joldamaǵan eken. Bul óz kezeginde «Qazaqstan Respýblıkasynyń Ulttyq kásipkerler palatasy týraly» Zańyn buzýshylyq bolyp tabylady. «Alaıda palatanyń aralasýy men erejege túzetýler engizýinen keıin de jalǵa alýshy kásipkerlerdiń problemalary sheshilgen joq», - dep atap ótilgen habarlamada.