Memlekettik materıaldyq rezervti ýaqtyly jańartýdyń jańa tásilderi engiziledi
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jumyldyrý daıyndyǵy men jumyldyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasynda 3 Kodekske (Bıýdjet kodeksi, «Halyq densaýlyǵy jáne densaýlyq saqtaý júıesi týraly», «Ákimshilik quqyq buzýshylyq týraly») jáne 4 Zańǵa («Jumyldyrý daıyndyǵy men jumyldyrý týraly», «Qazaqstan Respýblıkasynyń qorǵanysy jáne Qarýly Kúshteri týraly», «Qazaqstan Respýblıkasynyń ulttyq qaýipsizdigi týraly», «Azamattyq qorǵaý týraly») túzetýler engizý kózdelgen.
Jumyldyrý daıyndyǵy salasyndaǵy ýákiletti organǵa osy saladaǵy memlekettik baqylaý quzyreti beriledi. Baqylaý myna organdarǵa qatysty qoldanylady: bul – Qarýly kúshterdi, basqa da áskerler men áskerı qurylymdardy qospaǵanda, ortalyq atqarýshy memlekettik organdar; Qazaqstan Respýblıkasynyń zańdarynda kózdelgen jaǵdaılardy qospaǵanda, QR Prezıdentine tikeleı baǵynatyn jáne esep beretin memlekettik organdar; Jergilikti atqarýshy organdar.
«Ákimshilik quqyq buzýshylyq týraly» QR Kodeksiniń 462-baby boıynsha Ákimshilik quqyq buzýshylyq týraly hattamalar jasaýǵa quqyǵy bar laýazymdy adamdar tizbesi jumyldyrý daıyndyǵy salasyndaǵy ýákiletti organmen tolyqtyrylady. Bul memlekettik organdarǵa jumyldyrý daıyndyǵy men jumyldyrý salasynda jaýapkershilik belgileýge múmkindik beredi», - dedi QR Ulttyq ekonomıka mınıstri Rýslan Dálenov.
Memlekettik organdardyń jumyldyrý daıyndyǵy salasyndaǵy quzyretteriniń arajigi ajyratylyp otyr. Osylaısha, memlekettik organdardyń fýnktsııalary naqtylanatyn bolady.
«Jumyldyrý daıyndyǵy salasyndaǵy ýákiletti organǵa saqtandyrý qoryn qurý jáne saqtaý salasyndaǵy qyzmetti úılestirý quzyreti beriledi. Bul – qarý-jaraq pen áskerı tehnıka buıymdaryna, asa mańyzdy azamattyq ónimge tehnıkalyq qujattamanyń, sondaı-aq qaýiptiligi joǵary obektilerge, halyqtyń tynys-tirshiligin qamtamasyz etý júıelerine jáne ulttyq ıgilik bolyp tabylatyn obektilerge jobalyq qujattamanyń saqtandyrý qory.
Sonymen qatar mınıstr memlekettik materıaldyq rezervti ýaqtyly jańartýdy qamtamasyz etý úshin jańa tásilder engiziletinin atap ótti.
Bul – saqtaý pýnktteriniń materıaldyq qundylyqtardy jańartýyn engizý jáne materıaldyq qundylyqtardy óteýsiz negizde basqa memlekettik organdardyń balansyna berý. Sondaı-aq densaýlyq saqtaý salasyndaǵy ýákiletti organnyń jáne tegin medıtsınalyq kómektiń kepildik berilgen kóleminde qyzmet etetin biryńǵaı dıstrıbıýtordyń jumyldyrý rezerviniń medıtsınalyq maqsattaǵy dárilik zattary men buıymdaryn jetkizý, saqtaý jáne jańartý fýnktsııalaryn oryndaýy eskerilgen.
«Zań jobasy memlekettik jumyldyrý daıyndyǵy men memlekettik materıaldyq rezerv júıesin odan ári jetildirýge baǵyttaldy», - dedi Rýslan Dálenov.
