Memlekettik laýazymǵa úmitkerge qazaq tilin bilý boıynsha talap joq – agenttik

ASTANA. QazAqparat – Memlekettik laýazymdarǵa úmitkerlerdiń qazaq tilin meńgerýi boıynsha talap zańnamalyq deńgeıde rettelmegen. Bul týraly Májilis depýtattarynyń saýalyna Memlekettik qyzmet isteri agenttigi tóraǵasynyń mindetin atqarǵan Salaýat Múksimovtiń jaýabynda aıtylǵan, dep habarlaıdy QazAqparat tilshisi.

«Memlekettik qyzmet isteri agenttigi óz quzyreti aıasynda memlekettik tildi damytý jumystaryn únemi júrgizýde. Qazirgi ýaqytta memlekettik laýazymdarǵa úmitkerler úshin memlekettik tildi meńgerý deńgeıi boıynsha talap joq. Óıtkeni másele zańnamalyq deńgeıde rettelmegen. Atap aıtqanda, Konstıtýtsııanyń 7-babyna sáıkes Qazaqstan Respýblıkasynda qazaq tili memlekettik til bolyp tabylady. Memlekettik uıymdar men jergilikti ózin-ózi basqarý organdarynda qazaq tilimen teń dárejede orys tili resmı túrde qoldanylady. Konstıtýtsııanyń 14-babynda eshkimdi shyǵý tegine, áleýmettik, laýazymdyq jáne múliktik jaǵdaıyna, jynysyna, násiline, ultyna, tiline, dinge kózqarasyna, nanymyna, turǵylyqty jerine baılanysty nemese kez kelgen basqa mán-jaılar boıynsha kemsitýge bolmaıtyndyǵy kórsetilgen. Konstıtýtsııanyń 14-babynda kózdelgen quqyqtar men bostandyqtar eshbir jaǵdaıda shektelýge jatpaıdy», - dedi ol jaýabynda.
Onyń atap ótýinshe, Konstıtýtsııanyń 33-baby 4-tarmaǵynda respýblıka azamattarynyń memlekettik qyzmetke kirýge teń quqyǵy bar ekendigi jazylǵan. Memlekettik qyzmetshi laýazymyna kandıdatqa qoıylatyn talaptar laýazymdyq mindetterdiń sıpatyna ǵana baılanysty bolady jáne zańmen belgilenedi.
«Osyǵan qaramastan agenttik memlekettik qyzmette memlekettik tildiń aıasyn keńeıtý maqsatynda keshendi sharalardy júzege asyrýda. Atap aıtqanda, 2021 jyly ótkizilgen Prezıdenttik jastar kadr rezervine irikteýde úmitkerlerge memlekettik tildi kem degende orta deńgeıde (V1) meńgerý talaby engizildi. Bul rette, osy jyly úshinshi ret uıymdastyrylýy josparlanyp otyrǵan Prezıdenttik jastar kadr rezervine irikteý kezinde de memlekettik tildi bilý negizgi talap retinde bekitildi. Sonymen qatar, 2022 jyldan bastap Qazaqstan Respýblıkasy Prezıdentiniń janyndaǵy Memlekettik basqarý akademııasyna joǵary oqýdan keıingi bilim alýshy úmitkerlerge memlekettik tildi orta deńgeıden (V1) tómen emes bilýi boıynsha sertıfıkattarynyń bolýy týraly talap engizildi», - dedi Salaýat Múksimov.