Memlekettik qyzmettiń jańa júıesi: basshylyqqa deıin ósirý qalaı júrgiziledi
Astana. QazAqparat - Qazaqstandaǵy memlekettik qyzmet apparatynda merıtokratııa negizderin, ıaǵnı qyzmetkerdi satylap ósirý júıesin engizgeli beri mınıstrlikter men ákimdikterde isteıtin azamattardyń tarapynan konkýrstyń ashyqtyǵyna, appelıatsııaǵa jáne eńbek ótilin sanaýǵa qatysty san alýan suraqtar kóptep qoıyla bastady. Osyǵan baılanysty QR Memlekettik qyzmet isteri jáne sybaılas jemqorlyqqa qarsy kúres agenttiginiń mamandary Astanada arnaıy brıfıng ótkizip, memlekettik qyzmetkerlerdi mazalap júrgen saýaldarǵa jaýap berdi, dep xabarlaıdy QazAqparat.
«Máselen, Aqmola oblystyq ákimdiginde jumys isteıtin bir mamannnan suraq tústi. Ol bólim bastyǵy qyzmetine ótinish bergisi kelip júr. Biraq bas maman boıynsha eńbek ótili joq. Al memlekettik qyzmettiń jańa júıesi adamnyń satylap kóterilýin kózdeıdi. Qyzmetker joǵary qyzmetke aýysý úshin ózinen tómengi satyda, kem degende, bir jyl jumys isteýi tıis. Sondyqtan Aqmola oblysynan saýal joldaǵan azamatqa aıtarym, ol bólim basshysy qyzmetine aýysa almaıdy», - deıdi memlekettik qyzmet departamentiniń mindetin atqarýshy Jarqyn Tileýkenov.
Onyń aıtýynsha, búginde kez kelgen memlekettik organda bosaǵan oryn boıynsha aldymen ishki konkýrs ótedi. Oǵan apparat qyzmetkerlerinen bólek, aımaqtyq bólimshelerdiń mamandary da qatysa alady. Birinshi kezeńde jeńimpaz anyqtalmasa, konkýrstyń ekinshi kezeńi jarııalanady. Oǵan barlyq memlekettik organdardyń qyzmetkerlerine qatysýǵa bolady. Onda da laıyqty adam tabylmaı qalsa, úshinshi kezeń - jalpy konkýrs ótkiziledi. Sol kezde joǵary oqý oryndarynyń túlekteri de óz kandıdatýralaryn usyna alady. Alaıda, konkýrstardyń basym bóligi - 80 paıyzy birinshi satydan aspaı jatady, ıaǵnı bos turǵan orynǵa sol memlekettik organnyń ishinen laıyqty azamat tabylyp otyrady. Konkýrstardyń 20 paıyzy ekinshi jáne úshinshi kezeńge tıesili.
«Buryn basshy ózine jaqyn nemese jaqsy tanıtyn adamdardy qyzmettik aýystyrý tetigi arqyly taǵaıyndaıtyn. Basqalary tys qalyp otyrdy. Sebebi olar tikeleı bastyqpen jumys istegen joq. Sonda onyń jeke qabiletteri qyzmetke qoıylǵan adamnan joǵary bolsa da, basshylyq tarapynan eskerilmeıtin edi. Ondaı júıe kezinde memlekettik qyzmetkerlerdiń ósýge degen yntasy bolmaıtyn. Oǵan qosa, memlekettik apparatqa degen senim de tómen boldy. Qazir bári basqasha, konkýrs arqyly kez kelgen adam óziniń jeke qabiletterin kórsete alady. Sóıtip, joǵary laýazymǵa kóterilýge múmkindik bar», - deıdi J.Tileýkenov.
