Memlekettik qyzmettiń jańa modeli qandaı bolmaq
Oblystyq fılarmonııada ótken aktıv jıynynda memlekettik qyzmettiń jańa modeline kóshý barysy talqylanyp, sybaılas jemqorlyqqa qarsy kúres pen memlekettik qyzmet salasynda bolyp jatqan ózge de reformalyq ózgerister jaıy sóz boldy. Sondaı-aq, memlekettik qyzmetshilerdiń eńbekaqysyn tóleý júıesin jetildirý máselesi talqylanyp, kásipkerlikti jemqorlyqtan qorǵaý sharalaryn kúsheıtý kerektigi aıtyldy.
Agenttik tóraǵasynyń sózinshe, eń bastysy - sybaılas jemqorlyqqa qarsy kúres buqaralyq sıpatqa ıe bolýy tıis. Jańa ǵana bastalǵan «Qostanaı - adaldyq alańy» jobasy da osy maqsatty kózdeıdi.
«Búginde memlekettik qyzmetti jetildirý jáne sybaılas jemqorlyqqa qarsy saıasatty kúsheıtý baǵytynda birtalaı is atqaryldy. Qazaqstan qoǵamy korrýptsııadan ada zamanaýı quqyqtyq memleket qurýǵa kúsh salyp jatyr. Elimizdegi barlyq memlekettik qyzmetterdiń 47%-y elektrondy júıede júzege asyrylady. Aldaǵy ýaqytta bul kórsetkishti 90%-ǵa jetkizý kózdelip otyr. Qalǵan 10% servıstik uıymdar, memlekettik korporatsııalar arqyly atqarylady», - dedi A.Shpekbaev.
Eske salsaq, Elbasy bıylǵy Joldaýynda memlekettik qyzmetterdi tsıfrlyq júıede usynýdy tapsyrǵan bolatyn. Nátıjesinde, 2019 jyly memlekettik qyzmettiń 80%, al 2020 jyly 90% elektrondy formatqa aýysady.
Agenttik tóraǵasy sybaılas jemqorlyqqa qarsy kúrestiń basty tetigi zańdardyń oryndalýy ekenine basa toqtaldy.
«Memleket basshysynyń 2015-2025 jyldarǵa arnalǵan sybaılas jemqorlyqqa qarsy strategııa týraly Jarlyǵy shyqty. «Ult jospary» sheńberinde 60-tan astam jańa zań qabyldandy. Endigi mindet - osy zańdardyń ústemdigin tolyqqandy qamtamasyz etý. Alda atqarylatyn sharýa kóp. Sondyqtan bir orynda turyp qalmaýymyz kerek. Bizde kásibı memlekettik apparatty qalyptastyrý úshin barlyq múmkindikter bar, - dedi ol.
Alık Shpekbaev aıtqandaı, Qazaqstanda memlekettik qyzmettegi áıelderdiń úlesi 55%-ǵa jetken. Onyń 29% basshylyq laýazymdarda qyzmet etedi. Óıtkeni búginde áıel adamǵa degen senim kúsheıgen.
«Áıelder er adamdarǵa qaraǵanda, adal ári mindetine tııanaqty qarap, jemqorlyq táýekeline ońaılyqpen bara qoımaıdy. Jýyrda Astanada «Azııa-Tynyq muhıty» forýmyn ótkizdik. Forýmǵa kelgen sheteldik áriptesterimizben pikir-tájirıbe almastyq. Bir túsingenim - shetelde sybaılas jemqorlyqqa qarsy kúrestiń basy-qasynda kóbine áıelder júredi eken. Bul baǵyttaǵy jumystar bizde de jandanýy tıis», - dedi agenttik tóraǵasy.
Aıta keteıik, Qostanaı oblys ákimdigi men QR Memlekettik qyzmet isteri jáne sybaılas jemqorlyqqa qarsy is-qımyl agenttigi «Qostanaı - adaldyq alańy» atty birlesken jobany qolǵa aldy.
