Memlekettik qyzmettiń jańa qurylymynda qyzmetshiler úshin mansaptyq vertıkal naqty qamtylatyn bolady - Q. Nurpeıisov
ASTANA. 14 maýsym. QazAqparat /Qanat Mámetqazyuly/ - Memlekettik qyzmettiń jańa qurylymynda qyzmetshiler úshin mansaptyq vertıkal naqty qamtylatyn bolady.
Búgin QR Prezıdenti janyndaǵy Memlekettik basqarý akademııasynda ótip jatqan «Memlekettik qyzmettiń qazaqstandyq úlgisi: mindetteri men damý keleshegi» atty ǵylymı-praktıkalyq konferentsııa barysynda QR Memlekettik qyzmet isteri agenttiginiń tóraǵasy Qaırat Nurpeıisov osylaı málim etti.
«Byltyrǵy jyly qabyldanǵan Qazaqstannyń 2020 deıingi strategııalyq damý josparyna sáıkes, Memleket basshysy N. Nazarbaev elimizdiń memlekettik qyzmet júıesin jetildirýge qatysty birqatar naqty mindetter júktep otyr. Bul tapsyrmalardy oryndaý maqsatynda memlekettik qyzmettiń jańa úlgisiniń tujyrymdama jobasy ázirlengen bolatyn», - degen agenttik tóraǵasy atalǵan tujyrymdamanyń negizgi baǵyttaryna toqtalyp ótti. Onyń aıtýynsha, memlekettik qyzmetti jańǵyrtý eń aldymen onyń qurylymyn ózgertýdi talap etedi. Bul rette másele laýazymdardyń jańa reestrin ázirleý turǵysynda bolyp otyr. Ondaı reestr úsh korpýsqa negizdeletin bolady.
«Bular - saıası memlekettik qyzmetshilerdiń korpýsy, onyń ishinde ákimshilik memlekettik qyzmettiń basqarý jáne atqarý korpýsy qamtylady. Bundaı jikteýdiń jóni bar. Óıtkeni, osylaı bólý strategııalardy ázirleý, sheshim qabyldaý jáne olardyń oryndalý úderisteri arasynda asa naqty fýnktsıonaldy bólimderdi qamtıtyn bolady. Soǵan sáıkes, deńgeıdiń árbirinde qyzmetshi jetken jetistigine qaraı óz laýazymyn joǵarylatýǵa múmkindik alatyny kózdeledi. Osylaısha, memlekettik qyzmettiń jańa qurylymynda mansaptyq vertıkal qamtylatyn bolady», - dedi Q. Nurpeıisov.
