Memlekettik qyzmetti túbegeıli jańǵyrtýdy sapaly júzege asyrý máselesi talqylandy

ASTANA. QazAqparat - Búgin Memlekettik qyzmet isteri agenttiginde memlekettik qyzmet salasyndaǵy zańnamaǵa engizilgen tolyqtyrýlar men ózgeristerdi talqylaýǵa arnalǵan jıyn ótti, dep habarlaıdy QazAqparat.

«Memlekettik qyzmetti túbegeıli jańǵyrtýdyń negizgi maqsaty – halyqqa shynaıy, adal, ashyq qyzmet kórsetetin, bıýrokratııaǵa jol bermeıtin servıstik sıpattaǵy memlekettik apparat qalyptastyrý. Memleket basshysy erekshe atap ótken «Adam memleket úshin emes, memleket adam úshin» formýlasyn ustaný qajet. Bul - memlekettik basqarýdy jańǵyrtýdaǵy negizgi ustanym», - dedi agenttik tóraǵasy Darhan Jazyqbaev.

Ol memlekettik qyzmetti jańǵyrtýǵa jalań tapsyrma retinde qaramaı, onyń shynaıy ózgeristerge bastaıtyn mańyzdy qadam ekendigin tereńirek túsiný qajettigine toqtaldy.

Memlekettik qyzmetti túbegeıli jańǵyrtýdy sapaly júzege asyrý jáne jeke sektordan kásibı mamandardy memlekettik qyzmetke tartýdaǵy apparat basshylarynyń mańyzdy róli atalyp ótti.

Tolyqqandy strategııalyq HR-ınstıtýty bolyp qalyptasý aıasynda agenttik memlekettik organdardyń HR-seriktesine aınalady. Bul baǵytta kadr qyzmetterin transformatsııalaý jáne HR ınstıtýttaryn reınjınırıngteý boıynsha tıisti jumystar júrgizý kózdelýde.

«Adamı resýrs – bul ónimdilikti, eńbek tıimdiligin arttyrý úshin qoldanýǵa bolatyn adamdardyń áleýeti. Sondyqtan HR menedjer – bul ujymdy basqarýshy ǵana emes, ol adam resýrsymen jumys isteıtin, adamdardyń eńbek ónimdiligin arttyrýǵa tıimdi baǵyttaýshy maman. Qajetti mamandardy yntalandyratyn, baǵalaıtyn jáne izdeýshi adam. Osy oraıda, memlekettik apparattaǵy basshylyq laýazymdaǵy qyzmetkerler aldaǵy ýaqytta HR menedjerlerge aınalýy qajet», - dedi Agenttik tóraǵasy.

Jıyn barysynda memlekettik qyzmet týraly Zańǵa «kelisimsharttyq qyzmetshiler» uǵymy men rotatsııalyq tólemder engizý, Agenttikke memlekettik qyzmette qashyqtyqtan jumys jasaý jáne ıkemdi jumys kestesin retteý, memlekettik organdarda basshylar men oryndaýshylar sanyn retteý, jumys kestesiniń saqtalýyn baqylaýdy júzege asyrý quzyretin berý jáne t.b. engizilgen ózgerister aıtyldy.

Sondaı-aq 1 sáýirden bastap agenttikke memlekettik organdarda jumys rejımin buzý týraly ákimshilik isterdi qaraý boıynsha berilgen quzyreti qoldanysqa engiziledi.