Memlekettik qyzmetterdiń tizimi úsh esege arttyryldy - QR EDSM
ASTANA. 2 aqpan. QazAqparat /Jasulan Joldybaev/ - Memlekettik qyzmet kórsetý sapasy arta beretin bolady.
Bul týraly búgin Astanada atalmysh taqyrypqa arnalǵan dóńgelek ústel otyrysy barysynda Ekonomıkalyq damý jáne saýda mınıstrliginiń jaýapty hatshysy Dına Shajenova aıtty.
Qazaqstanda memlekettik qyzmet kórsetý sapasyn baqylaý júıesin engizý josparlanýda. Qyzmettiń sapasy men baqylaý isi Memlekettik qyzmet isteri jónindegi agenttiktiń moınyna júktelmek. Al zańdy jasaqtaý mindeti QR Ekonomıkalyq damý jáne saýda mınıstrligine berilgen.
«Búgingi tańda biz «Memlekettik qyzmet týraly» jańa zańdy jasaqtaýǵa kiristik. Onda atalmysh salanyń prıntsıpteri, mindetteri men damý negizderi naqtylanyp, bekitiletin bolady», - dedi jaýapty hatshysy.
«Elbasy óz Joldaýynda memlekettik qyzmet sapasyn arttyrý jóninde tapsyrma bergen bolatyn. Sonyń ishinde elektrondy úkimet jumysyn jetildirý, áleýmettik mańyzy bar qyzmetterdi halyqqa qyzmet kórsetý ortalyqtarynyń quzyryna berý mindeti basymdyqty bolyp tabylady», - dep atap ótti ol.
Onyń aıtýynsha, ótken jyldyń qorytyndysy boıynsha, HQKO arqyly 11,5 mln. qyzmet kórsetildi. Elektrondyq úkimet portaly arqyly 8 mln.-nan astam memlekettik qyzmet kórsetilgen.
«Biz bul baǵytta jumystardy jetildire beretin bolamyz. Máselen, memlekettik qyzmetterdiń tizimine 210 qyzmet túri ǵana engizilgen. Qazirgi ýaqytta jańa tizim jasaqtadyq. Onda bul tizim úsh esege arttyryldy», - dedi D. Shajenova.
