Memlekettik qyzmetten qysqartylǵan jalǵyzbasty ana sot arqyly jumysyna qaıta ornalasty

ORAL. 2 tamyz. QazAqparat -  Jánibek aýdandyq soty quqyǵy aıaqasty bolǵan memlekettik qyzmetshini jumysqa qaıta qabyldaýǵa sheshim qabyldady.      

Oblystyq sottyń baspasóz qyzmetinen habarlaǵanyndaı, Jánibek aýdandyq ekonomıka jáne qarjy bóliminiń ekonomıkalyq saıasat jáne kommýnaldyq menshikti qamtamasyz etý máseleleri jónindegi  jetekshi maman laýazymyn atqaryp otyrǵan, tárbıesinde bes jasar uly bar jalǵyzbasty kelinshek  shtattyń qysqartylýyna baılanysty jumyssyz qalǵan.

Óz quqyǵyn qorǵaý maqsatynda ol «Jánibek aýdandyq ekonomıka jáne qarjy bólimi» memlekettik mekemesinen jumystan qysqartylýy týraly buıryqty   zańsyz dep tanyp,  burynǵy qyzmetine qaıta ornalastyrýdy  jáne bos júrýge májbúr bolǵan ýaqytqa ortasha eńbek aqyny óndirý týraly sotqa talap aryz bergen.

Sot otyrysynda «Jánibek aýdandyq ekonomıka jáne qarjy bólimi» memlekettik mekemesiniń bastyǵy talap aryzdy ishinara  moıyndap, M-ny atqaryp júrgen laýazymynan bosatqan sebebin Jánibek aýdany ákimdiginiń jetekshi maman shtaty qysqartylý tıis  degen qaýlyny oryndaý maqsatynda eńbek shartynyń buzylǵandyǵymen, sonymen qatar, Eńbek týraly Kodekste jalǵyzbasty analarǵa kimder jatqyzylatyny kórsetilmegendikten, ajyrasqan, ıaǵnı buryn nekede turǵan áıelder jalǵyzbasty analarǵa jatpaıdy dep sanaýymen túsindirgen.

Qazaqstan Respýblıkasynyń Eńbek kodeksiniń 185-babynyń 1-tarmaǵyna sáıkes, júkti áıeldermen, úsh jasqa deıingi balalary bar áıeldermen, on tórt jasqa deıingi balany (on segiz jasqa deıingi múgedek balany) tárbıelep otyrǵan jalǵyzbasty analarmen, atalǵan balalar sanatyn anasyz tárbıelep otyrǵan ózge de tulǵalarmen eńbek shartyn jumys berýshiniń bastamasy boıynsha buzýǵa Eńbek kodeksiniń 54-baby 1-tarmaǵynyń 1), 3)-18) tarmaqshalarynda kózdelgen jaǵdaılardy qospaǵanda jol berilmeıdi.

Sot aıtylǵan jaǵdaılardy zerdeleı kelip,  «Jánibek aýdandyq ekonomıka jáne qarjy bólimi» memlekettik mekemesiniń ýájin dáıeksiz dep sanap,  M-ny laýazymynan bosatý týraly buıryqty   zańsyz dep tanyp, burynǵy qyzmetine qaıta ornalastyrý  jáne bos júrýge májbúr bolǵan ýaqytqa ortasha eńbekaqy óndirý týraly talap  aryzyn tolyqtaı qanaǵattandyrýǵa sheshim etti.