Memlekettik qyzmetten ketetinder qatary sıredi

ASTANA. QazAqparat - Sońǵy 2 jylda memlekettik qyzmetten ketetin kadrlar sany 6,2 paıyzǵa azaıdy. Bul týraly búgin Ortalyq kommýnıkatsııalar qyzmetindegi brıfıngte QR MQІSJQA Memlekettik qyzmet departamentiniń dırektory Jarqyn Tileýkenov aıtty.

«Sońǵy eki jylda kadrlardyń ketý kórsetkishi 6,2 paıyzdan aspaýda. Memlekettik qyzmetke alǵash ret kirgenderdiń arasynda qyzmetiniń birinshi jylynda óz erkimen jumystan shyqqandardyń sany edáýir qysqardy. Budan mynadaı qorytyndy jasaýǵa bolady: birinshiden, jas qyzmetshiniń jumysqa beıimdelýine járdemdesetin tálimgerlik ınstıtýtynyń jumysy jaqsardy; ekinshiden, uǵynyqty tańdaý jasaǵan jastardyń sany artyp, «kezdeısoq adamdardyń» sany azaıdy. Basqasha aıtqanda, sonyń ishinde memlekettik qyzmettiń tartymdylyǵyn joǵarylatý boıynsha qabyldaǵan sharalar kesheniniń arqasynda, biz kópshilik ony «tramplın» nemese «ýaqytsha turaq» retinde kóretin máseleni sheshe aldyq», - dedi Jarqyn Tileýkenov.

Onyń aıtýynsha, memlekettik qyzmet barynsha áleýmettik baǵdarlanǵan jumys berýshi bolyp qalýda.

«Tájirıbesiz adam úshin jumysqa turý ońaıǵa túspeıtini eshkimge de qupııa emes. Rekrýtıngtik saıttardy qaraıtyn bolsaq, jumys berýshilerdiń kóbisi eńbek ótilin talap etýde. Bul rette memlekettik qyzmet jas, bilimdi ári otansúıgish jastarǵa ashyq ekeni málim. Jumys tájirıbesi joq, biraq tıisti bilimi men áleýeti bar joǵary oqý ornynyń kez kelgen túlegi memlekettik qyzmetke, sonyń ishinde birden mınıstrlikke jumysqa tura alady», - dedi ol.