Memlekettik qyzmettegi kadrlardy irikteý men ilgeriletýdiń ádil júıesi qalyptasady - Jazyqbaev
«Agenttik osy jyldyń 11 qańtaryndaǵy Parlament Májilisiniń otyrysynda Memleket basshysy belgilegen strategııalyq mindetterdi iske asyrý boıynsha jumys júrgizdi. Memlekettik apparatty odan ári kásibılendirý agenttik basymdyqtarynyń biri bolyp qala beredi. Іrikteý júıesin jetildirý jáne memlekettik qyzmetten «shyǵý» tártibin jeńildetý jónindegi jumys jalǵasýda. Memlekettik qyzmettegi kadrlardy irikteý men ilgeriletýde merıtokratııa qaǵıdattaryna negizdelgen ashyq, eń bastysy ádil júıeni qalyptastyrý mańyzdy mindet bolyp otyr», – dedi Darhan Jazyqbaev agenttiktiń birinshi jartyjyldyqty qorytyndylaýǵa arnalǵan jıynynda.
Agenttik baspasóz qyzmetiniń málimetinshe, memlekettik apparattyń sapalyq quramyn arttyrýǵa qosymsha jaǵdaılar jasaý úshin halyqaralyq tájirıbeni zerdeleý negizinde ákimshilik memlekettik qyzmetke irikteý quraldaryn damytý is-sharalary qabyldanyp jatyr. Osylaısha, tsıfrlyq jáne mátindik aqparatpen jumys isteý qabiletine testileýdi, quzyretter boıynsha áńgimelesýdi, esse jazýdy jáne beıindi testileýden ótýdi qamtıtyn jańa tásilder qarastyrylady. Bul rette irikteý protsesiniń ashyqtyǵy men klıentke baǵdarlanýy konkýrstyq rásimderdi tolyq tsıfrlandyrý arqyly qamtamasyz etiletin bolady.
«Keıbir laýazymdarǵa memlekettik qyzmetke kirý tártibin jeńildetý qarastyrylýda. Sondaı-aq memlekettik qyzmetten «shyǵý» boıynsha tártip ońtaılandyrylady. Tıisti zań jobasy Parlamenttiń qaraýyna engizildi. Memlekettik bastamalar men salalyq jobalardy iske asyrý kezeńinde memlekettik organdarǵa arnaýly bilimi bar kásibı mamandardy tartý úshin kelisimsharttyq qyzmetshilerdi jaldaý múmkindigi beriledi», - dep atap ótedi vedomstvodan.
Foto: Memlekettik qyzmet isteri agenttigi
