Memlekettik qyzmette jetildirýdi qajet etetin másele kóp - Memlekettik qyzmet isteri jónindegi agenttik
ASTANA. Jeltoqsannyń 3-i. QazAqparat /Aıdar Ospanalıev/ - Memlekettik qyzmettiń tıimdiligin arttyrýdyń basty joldarynyń biri osy qyzmette adam resýrstaryn tıimdi basqarý júıesin engizip, kadrlardyń biliktilik deńgeıin turaqty arttyryp otyrý bolyp tabylady.
Bul týraly búgin Astanada «Memlekettik qyzmet pen jańa basqarý sheshimderin quqyqtyq qamtamasyz etý» atty taqyrypta ótken dóńgelek ústel otyrysynda Memlekettik qyzmet isteri jónindegi agenttik tóraǵasynyń orynbasary Asqar Shomanov málim etti, dep habarlaıdy QazAqparat.
Onyń aıtýynsha, sońǵy on jyl ishinde elimizde memlekettik qyzmettiń tıimdi júıesi qalyptasty. Soǵan qaramastan qazirgi zaman bul másele boıynsha óz talaptaryn qoıyp otyr. Sondyqtan memlekettik qyzmet te ózge salalar sııaqty turaqty jańaryp, jańǵyryp otyrýy tıis. «Búginde memlekettik qyzmet isterinde biz birshama jetistikterge jettik degenimizben, onda jetildirýdi qajet etetin problemalar jeterlik. Olardyń birinshisi azamattardyń memlekettik qyzmetke keler aldynda qoılatyn ereje nemese tártipke baılanysty. Mysaly, memlekettik qyzmetke aralasýǵa nıet bildirgen azamattarǵa qoıylatyn testileý sharalary olardyń memlekettik qyzmetke qatysty normatıvti-quqyqtyq bazany meńgerý deńgeıin ǵana anyqtaýǵa múmkindik beredi. Al olardyń biliktilik deńgeıin mundaı tásilmen anyqtaý múmkin emes. Onyń ústine memlekettik organdardaǵy konkýrstyq komıssııanyń jumysy qaǵaz júzinde ǵana jumys isteıdi», dedi agenttik tóraǵasynyń orynbasary.
Onyń pikirinshe, ekinshi másele kadr máselesine kelip tireledi. Qazirgi tańda memlekettik qyzmette jumys istep jatqan kadr rezervi ókinishke qaraı, óziniń tıimdiligin kórsete almady. «Bizdegi ákimshilik kadr rezervin jasaqtaý sharalary keı jaǵdaıda memlekettik qyzmetke konkýrstyq irikteýsiz-aq aralasý tásili retinde qoldanylady. Al memlekettik qyzmetkerlerdiń biliktiligin arttyrý nemese olardy daıyndaý men qaıta daıyndaý jumystary kóp jaǵdaıda tek formaldy túrde ǵana júrgiziledi. Bul baǵyttaǵy sharalarǵa memlekettik organdar da asa qyzyǵýshylyq tanytyp otyrǵan joq. Basqasha aıtqanda, memlekettik organdardyń memlekettik qyzmetkerlerdiń biliktiligin arttyrýmen aınalysatyn kadr qyzmeti ózderine júktelgen mindetti talapqa saı júzege asyra almaı otyr», dedi A.Shomanov.
