Memlekettik qyzmette jalaqy az, al talap kóp - Mamyraev
ASTANA. QazAqparat - «Qazaqstannyń memlekettik-jekeshelik ortalyǵy» AQ tóraǵasynyń orynbasary, «Bolashaq» baǵdarlamasynyń túlegi Ǵalymbek Mamyraevtyń oıynsha, aldaǵy ýaqytta memlekettik qyzmet júıesi ózgeretin bolady. Oǵan qazirgi reformalar da áser etedi, dep xabarlaıdy QazAqparat tilshisi.
«Ashyǵyn aıtý kerek, memlekettik qyzmette júrgen adamdar óte az aqsha alady. Biz olardyń jalaqysyn az tóleımiz de, kóp nárseni talap etip otyramyz. Búginde adamdardyń alyp jatqan aqshasynan artyq nárseni talap ete almaıtynymyzdy túsinetin kez keldi. Ondaı júıe logıkaǵa qaıshy jáne ekonomıka zańdaryna kereǵar. Adamdarǵa stımýl kerek. Iá, keıbireýler aqsha mańyzdy emes, men ıdeıa úshin jumys istep jatyrmyn deıdi. Degenmen, 50 myń alyp, jańa ıdeıa tabý múmkin emes. Tolyqqandy ómir súrmeseń, tolyqqandy jumys ta isteı almatynyń beseneden belgili», - dedi Ǵalymbek Mamyraev búgin Prezıdenttiń Joldaýyna arnalǵan jıynda.
Osy oraıda «Bolashaqtyń» túlegi Sıngapýrdyń tájirıbesin mysal retinde keltirdi. Ol jaqta xalyq óz jalaqysynyń biraz bóligin zeınetaqyǵa, densaýlyq saqtaý júıesine salyp qoıyp otyrady. Artynan ol aqshany kúndelikti qajettilikterge, tipti baspanany satyp alýǵa jumsaıdy. «Árıne, ol úshin xalyqtyń tabysy joǵary bolýy tıis. Ol jaıynda árbir Joldaýda aıtylyp otyrady. Osy turǵyda biraz sharalar da atqarylyp keledi. Shyn máninde, xalyqtyń tabysy nomınaldy túrde óte jaqsy ósti. Degenmen, shyn jaǵdaıda olaı emes», - dep atap kórsetti Mamyraev. Osydan keıin ol «Bolashaq» baǵdarlamasymen oqýǵa túskeli jatqan jáne oqyp júrgen jastarǵa Qazaqstanǵa oralǵannan keıin kóp jalaqy alamyn dep úmittenbeýge keńes berdi.
